- बस्तर अऊ सरगुजा जिला मन म सबसे पहिली लगाये जाही टॉवर
- 14,202 गांव मन म 4 जी वोल्टी नेटवर्क पहुंचाए पहिली के लगे टॉवर मन के अलावा 1638 नवा टॉवर स्थापित करे जाही
रायपुर, छत्तीसगढ़ मंत्रिपरिषद् के 11 जुलाई 2019 के दिन आयोजित बैठक म कनेक्टिविटी रहित गांव मन तक नेटवर्क विस्तार करे के निर्णय लेहे गए हे। मुख्यमंत्री श्री भूपेश बघेल ह चिप्स ल एखर तहत स्काई योजना के माध्यम ले 11 सौ ले जादा गांव मन म नेटवर्क विस्तार बर 4 जी वोल्टी नेटवर्क वाले मोबाईल टॉवर स्थापित करे के निर्देश देहे हें।
चिप्स के मुख्य कार्यपालन अधिकारी श्री के.सी. देवसेनापति ह जानकारी दीन हे कि राज्य के कनेक्टिविटी रहित 14 हजार ले जादा गांव मन म 4 जी वोल्टी नेटवर्क उपलब्धता सुनिश्चित करे बर योजना के संचालन करे जात हे। उमन बताइन कि मुख्यमंत्री श्री भूपेश बघेल के मंशा के मुताबिक राज्य के कम कनेक्टिविटी वाले बस्तर अऊ सरगुजा संभाग म सर्वोच्च प्राथमिकता के संग 4 जी वोल्टी नेटवर्क के उपलब्धता सुनिश्चित करे जाही। अभी तक राज्य के 938 नवा टॉवर स्थापित करके 13 हजार ले जादा गांव मन म 4 जी वोल्टी मोबाईल नेटवर्क स्थापित कर लिए गये हे।
इहां ये बताना जरूरी हे कि गांव मन म 4 जी वोल्टी नेटवर्क विस्तार बर मोबाईल टॉवर स्थापित करे ले नागरिक सशक्तिकरण अऊ वित्तीय समावेश ल बढ़ावा मिलही। एखर से ई-शासन सेवा मन ल नागरिक मन तक उपलब्ध कराए म घलोक सुविधा होही। ये नेटवर्क के विस्तार ले जन्म-मृत्यु प्रमाण पत्र, आय-निवास प्रमाण पत्र आदि बहुत अकन शासकीय सेवा मन राज्य के ग्रामीण निवासी मन ल ऊंखर घर के तीरेच म मिल सकही। एखर से ग्रामीण नागरिक मन ल ए काम मन बर भटके के जरूरत नइ होही अऊ ऊंखर बहुमूल्य समय अऊ धन के बचत होही।
4 जी वोल्टी मोबाईल टॉवर स्थापित करे ले राज्य म प्रत्यक्ष लाभ हस्तांतरण के व्यवस्था सुदृढ़ होही। महिला मन कोति ले संचालित स्व-सहायता समूह मन ल घलोक नवा बाजार खोजे अऊ वित्तीय रूप ले स्वतंत्र ने म सहायता मिलही। ग्रामीण युवा मन ल गांव म ही वैश्विक स्तर के ज्ञान अऊ जानकारी मिल सकही जऊन ओ मन ल रोजगार के बनेच अवसर खोजे अऊ उद्यमशीलता ल बढ़ावा देहे म उपयोगी होही। अइसनहे मौसम के स्थिति जाने, कृषि उपज मन के बाजार दर अऊ फसल के सबसे अधिक मूल्य के जानकारी प्राप्त करे म घलोक 4 जी वोल्टी नेटवर्क उपयोगी बनही।