रायपुर, 24 अगस्त 2020। राजधानी रायपुर म लॉकडाउन के बेरा गोदाम अउ ऑफिस ले 50 लाख रुपिया के टायर गायब होय के मामला आगु आये हे. मालिक ल अपन मैनेजर उपरर शक हे कि वो टायर चोरी करके फरार होगे हे. जेखर बाद सिविल लाइन थाना म मालिक अंशय सहगल ह मैनेजर के खिलाफ शिकायत करत हुए केस दर्ज कराये हे.
सिविल लाइन थाना प्रभारी आरके मिश्रा के अनुसार पीड़ित अंशय सहगल के मेसर्स सहगल नाम ले टायर के दुकान सिविल लाइन इलाका म हे. एखर गोदाम रिंग रोड उरला म हे. लॉकडाउन के बेरा तीन-चार महीना ले अंशय सहगल अपन गोदाम नई गे रिहिस. तीन दिन पहली जब वो अपन गोदाम जाके देखिस त बड़का मात्रा म सामान गायब रिहिस. चोरी होय माल करीब 50 लाख रुपिया के हे. लॉकडाउन के बेरा ओखर मैनेजर गोदाम म रहत रिहिस, एखर सेती ओखर उपर आशंका हे. अभी वो फरार हे. तलाश करे जावत हे.
