- तीर्थ स्थल करतारपुर साहब जाके दर्शन के सुविधा मिले म दीन बधाई
- गुरूनानक देव जी ह प्रेम अऊ मानवता के रद्दा देखाइन : सुश्री उइके
रायपुर, राज्यपाल सुश्री अनुसुईया उइके ह आज स्थानीय खालसा स्कूल म श्री गुरूसिंघ सभा, रायपुर कोति ले आयोजित गुरू नानक देव जी के 550वां प्रकाश पर्व म सामिल होके उपस्थित मनखे मन ल प्रकाश पर्व के हार्दिक बधाई अऊ शुभकामना दीन। उमन कहिन कि ये पइत प्रकाश पर्व कई मायने म खास हे। ये 550 वां प्रकाश पर्व ये अऊ ये बेरा म सिक्ख धर्म के प्रमुख तीर्थ स्थल करतारपुर साहब जऊन कि पाकिस्तान म स्थित हे, उहां जाके दर्शन करे सुविधा घलोक भक्त ल अब मिल सके हे।
राज्यपाल सुश्री उइके ह कहिन कि गुरु नानक देव जी के उपदेश आज घलोक प्रासंगिक हे अउ आज तो एकर जरूरत अऊ जादा हे। कहूं हम गुरु नानक देव ल मानथन, त ये समझना चाही कि इंसानियत ले बड़का कोनो धरम नइ हे। उंखर संदेश हे ‘अव्वल अल्लाह नूर उपाया कुदरत के सब बंदे एक नूर ते सब जग उपजेया कोन भले कौ मंदे’ मने सबो इंसान एक दूसर के भाई हे। ईश्वर सबके पिता हे, फेर एक पिता के संतान होए के बाद घलोक हम ऊंच नीच कइसे हो सकत हन। गुरू नानक जी ह सिक्ख धर्म म लंगर के प्रथा सुरू करवाईन, जेमां भेद भाव ले परे अमीर गरीब सब एक जगा म बइठ के लंगर खावंय, इही संदेश येमा रहिस।
राज्यपाल ह कहिन कि हमार भारत देश म, हर युग म अइसन संत अऊ महापुरूष मन ह जनम लेहे हें, जेमन समाज ल नवा रद्दा देखाईन। जऊन समय गुरू नानक देव जी परगट होए रहिन, ओ बखत समाज म छुआछूत, ऊंच-नीच, असमानता, कुरीति जइसे बहुत अकन बुराई व्याप्त रहिस। गुरूनानक देव जी के उपदेश ले ज्ञान के उजाला फैलिस। उमन विश्व शांति अऊ मानव कल्याण बर प्रेम, सद्भावना अऊ भाईचारा के रद्दा म चले के प्रेरणा दीन। गुरूनानक देव जी ह नेकी अऊ भलाई के रद्दा देखाईन। मदद करे अऊ आपसी सहयोग अऊ सौहार्द्र ल बढ़ाए के बात कहिन। उमन जनमानस म सेवा के भावना बर प्रेरणा दीन।
राज्यपाल ह कहिन कि प्रकाश पर्व के ये बेरा म हम ये संकल्प लेवन कि गुरू नानक देव जी के विचार ल हम हमेसा मानबोन। उमन आग्रह करिन कि आपसी सद्भाव, समरसता अऊ प्रेम ले समन्वय बनाके रखव। सामंजस्य के संग रहे म हमर देश मजबूत बनही अऊ जनता सही तरीका ले जीवन यापन करहीं, जेखर से देश अऊ प्रदेश म अमन-चैन अऊ खुशहाली कायम रइही।
ये बेरा म गुरूसिंघ सभा के पदाधिकारी मन कोति ले राज्यपाल ल शाल-श्रीफल अऊ सरोपा भेंट करे गीस। ये मौका म गुरूसिंघ सभा के अध्यक्ष श्री दिलीप सिंह होरा, पूर्व विधायक श्री गुरूमुख सिंह होरा, उपाध्यक्ष श्री प्रीतपाल सिंह होरा, विधायक श्री कुलदीप जुनेजा, विधायक श्री सत्यनारायण शर्मा अऊ बड़ी संख्या म श्रद्धालुजन उपस्थित रहिन।
ये समाचार ल आप हिन्दी म ये कड़ी ले पढ़ सकत हव.