आन राज्य मन म फंसे छत्तीसगढ़ के मजदूर मन के वापसी के सिलसिला जारी

गुजरात के खेड़ा नाडीयाड ले चले स्पेशल ट्रेन ले रायपुर स्टेशन म उतरिन 65 मजदूर

रायपुर, 15 मई 2020। मुख्यमंत्री श्री भूपेश बघेल के पहल म आन राज्य मन म फंसे छत्तीसगढ़ के मजदूर मन अऊ आन मनखे मन ल लाय के सिलसिला जारी हे। इही क्रम म गुजरात के खेड़ा नाडीयाड ले चले श्रमिक स्पेशल ट्रेन ले आज बिहनिया रायपुर स्टेशन म 65 मजदूर उतरिन। एमा बलौदाबाजार जिला के 45, धमतरी जिला के 6, राजनांदगांव जिला के 6 अऊ कोंडागांव जिला के 8 मजदूर सामिल रहिन। एखर बाद ये ट्रेन बिलासपुर होके चांपा बर रवाना हो गीस।

मजदूर मन के रायपुर स्टेशन आगमन म फिजिकल डिस्टेसिंग के पालन करत ओ मन ल दू-दू बोगी ले बारी-बारी ले उतारे गीस। इहां सबो मजदूर मन के मेडिकल टीम ह स्वास्थ्य जांच, थर्मल स्क्रीनिंग अऊ पल्स ऑक्सीमीटर ले ऊंखर तापमान के संगें-संग पल्स अउ ऑक्सीजन सांद्रता के घलोक जांच करे गीस। एखर बाद ओ मन ल विशेष बस ले ऊंखर जिला मन के क्वारेन्टाइन सेन्टर भेजे गीस। सबो श्रमिक मन ह लाइन म लगके सोशल डिस्टेंसिंग बनात स्वास्थ्य परीक्षण के बादेच स्टेशन ले बाहिर निकलिन। सबो मजदूर मन ल हिदायत देहे गीस के ओ मन 14 दिन क्वेरेंटाइन म रहंय अऊ कोरोना ले बचाव अउ रक्षा बर सबो निर्देश मन के पालन करंय। मजदूर मन ल क्वारेन्टाइन सेन्टर भेजे बर बस मन के घलोक व्यवस्था करे गए रहिस। ओ मन ल इहां पैक्ड भोजन घलोक देहे गीस। ट्रेन आए के पहिली स्टेशन के प्लेटफार्म ल सैनिटाइज करे गए रहिस। ये बेरा म जिला पंचायत के मुख्य कार्यपालन अधिकारी डॉ. गौरव कुमार सिंह, अकतहा जिला दंडाधिकारी श्री विनीत नन्दनवार संग रेलवे के वरिष्ठ अधिकारी अउ स्टेशन डायरेक्टर श्री बीपीटी राव घलोक उपस्थित रहिन।