महासमुन्द, 28 सितंबर 2020। पिथौरा वन परिक्षेत्र के ग्राम किसनपुर म एक मादा गर्भवती हाथी के करंट लगे ले मौत होगे रिहिस। हाथी के मौत के बाद ले ही वन विभाग के डाहर ले आरोपी मन ल गिरफ्तार करके सलाखों के पीछू भेजे के तैयारी चलत रिहिस। घटना के जानकारी के बाद ले ही वन विभाग के टीम ह ग्रामीण मन ले पूछताछ शुरू करके आरोपी मन के सुराग खोजे म लगे रिहिस। वन विभाग के टीम ह 24 घंटा म सुलझात हुए वन्य जीव प्राणी मन के शिकार करइया अउ गर्भवती हाथी के मौत बर जिम्मेदार 9 आरोपी मन ले 7 आरोपी मन ल गिरफ्तार कर ले हे। वन विभाग के टीम 2 आरोपी मन के तलाश म हे।
वन विभाग ले मिले जानकारी के अनुसार गिरफ्तार करे गे आरोपी किशनपुर, लक्ष्मीपुर अउ रामपुर के रहइया हे। जोन म मखियार यादव, गौरीशंकर, सहदेव, नरोत्तम साहू, सिरपत बरिहा, अमृतलाल यादव, अशोक बुड़ेक, जयनाथ अउ निराकार बरिहा शामिल हे। एमा ले अशोक बुड़ेक अउ जयनाथ फरार हे, उहें बाकी 7 ल विभाग ह गिरफ्तार कर ले हे। आरोपी मन ह बीते कुछ दिन म करंट ले मादा भालू के शिकार के बात घलो कबूल करे हे। आरोपी मन ह भालू के शिकार के बाद ओखर शव ल जंगल के पहाड़ म छुपा दे रिहिस। जेखर उपर विभाग ह निशानदेही म भालू के शव के कुछ अंश बरामद कर ले हे। विभाग ह आरोपी मन ले बिजली तार, हुकिंग बांस, लकड़ी खूंटी, तार म लगे कांच शीशी अउ जीआई तार बरामद करे हे। आरोपी मन ह पिथौरा वन परिक्षेत्र के किशनपुर के कक्ष क्रमांक 491 नारंगी क्षेत्र म मादा हाथी के करंट लगा के मौत के घाट उतार दे रिहिस। आरोपी मन के खिलाफ वन्य प्राणी संरक्षण अधिनियम के धारा 9, 39, 50, 51 अउ भारतीय वन अधिनियम के धारा 33 के तहत कार्रवाई करे जावत हे।