दंतेवाड़ा, 19 सितंबर 2020। नदिया म नहाये बर गे 7 मजदूर शंखनी नदी के तेज बहाव म फंसगे। जोन मन ल रेस्क्यू करके बीते दिन देर शाम सुरक्षित बाहर निकाले गिस।
बताये जावत हे कि चंदेनार गांव के 7 मजदूर रावणडेंग के तिर नदिया म नहाये बर गे रिहिस। नहात बेरा नदिया के जलस्तर अचानक बढ़गे जेखर चलत सबो मजदूर बीच म फंसगे। कुछ लोगन मन ह एखर सूचना पुलिस ल दीन। जेखर बाद नगर सेना के टीम रेस्क्यू बर रवाना होइस।
रेस्क्यू के दौरान एसडीआरएफ के टीम ल मुश्किल के सामना करना पड़िस। टीम ह दुनों सिरा म रस्सी बांध के धीरे-धीरे एक-एक कर सबो सातों मजदूर मन ल बाहर निकालिस। अंधेरा होय के सेती ले टीम ल सर्च लाइट के सहारा लेना पड़िस।