छत्तीसगढ़ म एक संग 7 खेल अकादमी के ऐतिहासिक शुरूआत

रायपुर, मुख्यमंत्री श्री भूपेश बघेल ह आज राज्य के खिलाड़ी मन बर एक संग 7 खेल अकादमी के ऐतिहासिक शुरूआत करिन। एमां ले बिलासपुर म 4 अऊ रायपुर म 3 खेल अकादमी आज विधिवत चालू हो गीस। बिलासपुर म हॉकी, तीरंदाजी, एथलेटिक्स अऊ कबड्डी अकादमी अऊ रायपुर म तीरंदाजी, बालिका फुटबाल अऊ बालक-बालिका एथेलेटिक्स अकादमी के शुभारंभ होइस। मुख्यमंत्री श्री बघेल ह आज अपन निवास कार्यालय म आयोजित वर्चुअल कार्यक्रम के माध्यम ले प्रदेश के खिलाड़ी मन ल बड़का सौगात देवत बिलासपुर अऊ रायपुर म करीबन 42 करोड़ 14 लाख रूपिया के लागत वाले नवा खेल सुविधा मन के लोकार्पण अऊ भूमिपूजन करिन।
बिलासपुर म हांकी, तीरंदाजी, एथलेटिक्स के बोर्डिंग अऊ कबड्डी (बालिका) अकादमी अऊ रायपुर म तीरंदाजी के बोर्डिंग, फुटबाल (बालिका) अऊ एथलेटिक्स (बालक-बालिका) के डे-बोर्डिंग अकादमी कुल 370 सीटर हे, जेमां 180 बोर्डिंग सीट अऊ 190 डे-बोर्डिंग सीट सामिल हे। मुख्यमंत्री ह बिलासपुर के स्वर्गीय बी.आर. यादव राज्य खेल परिसर म 9.20 करोड़ रूपिया के लागत ले बने 400 मीटर सिंथेटिक एथलेटिक्स ट्रेक एण्ड फील्ड, 2.82 करोड़ के लागत ले बालक मन बर निर्मित 50 सीटर खेल छात्रावास, 4.75 करोड़ के लागत ले बालिका मन बर निर्मित 100 सीटर खेल छात्रावास अऊ 4.47 करोड़ रूपिया के लागत ले निर्मित प्रशासनिक भवन के लोकार्पण करिन। ये बेरा म उमन बिलासपुर म 4 करोड़ 94 लाख रूपिया के लागत ले बनइया कबड्डी इंडोर हॉल, 15 करोड़ 96 लाख रूपिया के लागत ले एस्ट्रोटर्फ हॉकी स्टेडियम के गैलरी अऊ पेवेलियन के निर्माण संग उहां फ्लड लाईट लगाए के काम के आधारशिला रखिन। मुख्यमंत्री ह रायपुर के सरदार वल्लभ भाई पटेल अंतर्राष्ट्रीय हॉकी स्टेडियम परिसर म स्वर्गीय श्री कोदूराम वर्मा स्मृति तींरदाजी प्रशिक्षण अकादमी, स्‍वामी विवेकानंद स्टेडियम परिसर कोटा म बालिका मन बर फुटबाल अकादमी अऊ बालक-बालिका मन बर एथेलिटक्स अकादमी के घलोक शुभारंभ करिन।
ये बेरा म मुख्यमंत्री निवास म गृह मंत्री श्री ताम्रध्वज साहू, कृषि मंत्री श्री रविन्द्र चौबे, स्कूल शिक्षा मंत्री डॉ. प्रेमसाय सिंह टेकाम, खाद्य मंत्री श्री अमरजीत भगत, वन मंत्री श्री मोहम्मद अकबर, राजस्व मंत्री श्री जयसिंह अग्रवाल, राज्यसभा सांसद श्रीमती छइंहा वर्मा, छत्तीसगढ़ राज्य गृह निर्माण मंडल के अध्यक्ष श्री कुलदीप जुनेजा, विधायक श्रीमती अनिता योगेन्द्र शर्मा, महापौर श्री एजाज ढेबर, छत्तीसगढ़ ओलंपिक संघ के महासचिव श्री गुरूचरण होरा, मुख्यमंत्री के अपर मुख्य सचिव श्री सुब्रत साहू, मुख्यमंत्री के सचिव श्री सिद्धार्थ कोमल सिंह परदेशी, खेल अऊ युवा कल्याण विभाग के सचिव श्री एन.एन. एक्का, संचालक श्रीमती श्वेता श्रीवास्तव सिन्हा संग आन अधिकारी उपस्थित रहिन। कार्यक्रम म खेल अऊ युवा कल्याण मंत्री श्री उमेश पटेल, बिलासपुर के सांसद श्री अरूण साव, संसदीय सचिव श्रीमती रश्मि आशीष सिंह, पर्यटन मण्डल के अध्यक्ष श्री अटल श्रीवास्तव, महापौर बिलासपुर श्री रामशरण यादव संग आन जनप्रतिनिधि अऊ रायपुर अऊ बिलासपुर के कार्यक्रम स्थल ले कई ठन खेल संघ ले जुड़े पदाधिकारी अऊ खेलप्रेमी वर्चुअल रूप ले सामिल होइन।