- रायपुर जिला के 8699 किसान मन ल फसल बीमा के मिलीस लाभ
- 7 करोड़ रुपिया के होइस भुगतान
रायपुर, 23 अप्रैल 2020। जोरदार बरसा होवय या बिजली कड़कय, किसान अपन जान के परवाह करे बिना खतरा के बीच दू जुवर के रोटी बर हर समें मेहनत करत रहिथे। वो बड़ मेहनत करके अन्न उबजाथे। किसान मन ल पीरा त तब होथे जब ओ मन खेत म नांगर चलाथें अऊ बड़ भरोसा के संग ये सोचके बीज बोथें के ये पइत फसल अच्छा होही, कुछ धान बेचके वो अपन करजा चुका देही, थोकन पइसा बचाके घर बर जरूरी सामान बिसाही, फेर जब बादर बने सहिन बरसय नहीं, घाम म फसल सूखा जाथे अऊ कभू खड़े फसल बे मौसम बारिश अऊ करा के चपेट म आके चौपट हो जाथे त अपन सपना ल थोरकेच कन म टूटत देखके किसान मन के का गुजरथे, ये तो उही मन जानथें।
असनहे जब महिला किसान श्रीमती नीरजा के फसल कम बरसा ले खेते म सूखा गीस, त वोकर बर त मानो दुःख के पहाड़ टूट परिस। अपन रोजी – रोटी बर चिंता करत किसान मन ल सरकार के सहारा नइ मिलही त कोन जनि का ले का हो जातिस? कहूं छत्तीसगढ़ सरकार ह किसान मन के हित म कदम नइ उठाए रहितिस त किसान मन फेर उठके खड़ा नइ हो पातिन। सरकार ह समर्थन मूल्य म धान खरीदी के संगेच उलट परिस्थिति मन म फसल ल होए नुकसान के भरपाई बर फसल बीमा करे के जऊन बीड़ा उठाए हे ओखर से श्रीमती नीरजा जइसे ललित साहू, भैरव, सरला जइसे किसान मन ल कोरोना वायरस के सेती होए लॉक डाउन के दौर म घलोक मुस्काए के मौका मिले हे। रायपुर जिला म 8699. किसान मन ल 7 करोड़ रुपए के फसल बीमा के राशि देहे गए हे।
अइसनहे तिल्दा विकासखंड के ग्राम सगुनी के कृषक श्रीमती चित्रलेखा कश्यप, खैरखूँट के कृषक भैरव हनुमंता, श्रीमती सरला शुक्ला, ललित ग्राम मोहदा के कृषक सूर्यप्रकाश, खैरखूँट के श्रीमती रूखमणी वर्मा, श्रीमती नीरजा के आर्थिक स्थिति ल मजबूत बनाए म ये योजना ह अड़बड़ मददगार साबित होए हे।
रायपुर जिला के किसान मन ल खरीफ-2019 के लॉक डाउन के समय म फसल बीमा के राशि देहे जात हे। जिला के 8699 किसान मन ल साढे 7करोड़ रूपिया भुगतान करे जाही। अभी तक 7966 किसान मन ल 6 करोड़ 55 लाख रूपिया के राशि देहे गए हे। फसल बीमा के तहत जिला के तिल्दा विकासखंड के 1547, अभनपुर के 669, आरंग के 3756 अऊ धरसींवा के 2727 किसान लाभांवित होए हें।