रायपुर, 29 जुलाई 2020। प्रदेश के 89 हजार नौनिहाल मन के आवाज अब ऊंखर खुद के आंगनबाड़ी भवन मन म गूंजही। एकरे संगेच किशोर युवती, गर्भवती महिला अऊ शिशुवती माता मन ल बेहतर वातावरण मिल सकही। एखर बर महासमुंद जिला म महात्मा गांधी राष्ट्रीय रोजगार गारंटी योजना(मनरेगा) अऊ महिला अउ बाल विकास विभाग कोति ले 5 करोड़ 87 लाख 95 हजार के लागत ले 91 आंगनबाड़ी केंद्र के भवन बनाए जाही। ये राशि म मनरेगा ले 4 करोड़ 55 लाख रूपिया अऊ महिला बाल विकास ले 1 करोड़ 32 लाख रूपिया खरचा करे जाही। सबले जादा 40 आंगनबाड़ी केन्द्र बसना जनपद पंचायत म अऊ 25 केन्द्र बागबाहरा जनपद पंचायत म बनत हे। एखर संगेच सरायपाली म 11, पिथोरा म 9 अऊ बांचे महासमुंद जनपद पंचायत म बनही। एखर से आंगनबाड़ी केंद्र मन म पंजीकृत 89 हजार 300 नौनिहाल मन ल लाभ मिलही।
आंगनबाड़ी भवन मन ल सर्वश्रेष्ठ आंगनबाड़ी केन्द्र के श्रेणी म लाय के पूरा तैयारी करे गए हे। एखर बर मानक के मुताबिक आंगनबाड़ी केन्द्र मन ल बनाय जाही। लइका मन बर अच्छा वातावरण अऊ उंखर सुरक्षा उपर विशेष ध्यान देहे जात हे। आंगनबाड़ी म आउटडोर गतिविधि मन बर चारदीवार घलोक बनाए जात हे। सबो आंगनबाड़ी मन ल मॉडल के रूप म विकसित करे ल कहे गए हे जेमां लइका मन के खेले बर जगा के संगें-संग आन सुविधा खेलौना, झूला, बोर्ड, किताब घलोक उपलब्ध कराए जाए ताकि लइका मन के आंगनबाडी आए म रूचि बने रहय।
ग्राम पंचायत क्षेत्र म पंचायत मन के माध्यम ले आंगनबाड़ी भवन निर्माण करे जाही। एखर से स्थानीय मनखे मन ल घलोक रोजगार मिलही। एक भवन के निर्माण म 6 लाख रूपिया ले जादा खर्च करे जाही। महिला अउ बाल विकास विभाग के जिला कार्यक्रम अधिकारी श्री मनोज सिन्हा ह बताइस के जिला म एक हजार 763 आंगनबाड़ी केंद्र मन म ले एक हजार 625 केन्द्र मन बर भवन बना लेहे गए हे। लेमन ग्रीन विलेज के नाम ले चिन्हे जात बागबाहरा विकासखंड के ग्राम पंचायत टेमरी म लॉक डाउन के समय गाइड लाइन के पालन करत 4 महिना ले घलोक कम समय म आंगनवाड़ी भवन तियार कर ले गए हे। अभी हाल म कुछ केन्द्र किराया के भवन अऊ कुछ सामुदायिक या आन सरकारी भवन मन म संचालित करे जात हे। अब कई ठन जनपद मन बर 91 आंगनबाड़ी केन्द्र बनाए के तैयारी हो गए हे। जनपद मन के मुख्यकार्यपालन अधिकारी मन ल एला जल्दी पूरा करे के निर्देश देहे गए हे। आंगनबाड़ी भवन बन जाय ले लइका मन के पोषण, स्वास्थ्य अऊ शिक्षा संबंधी जरूरत मन के पूर्ति बेहतर तरीका ले करे के संग ओ मन ल अच्छा वातावरण मिल सकही।