चुकता करिस ट्रेक्टर के करजा, आथे सुख के नींद
नारायणपुर, जिला मुख्यालय नारायणपुर ले सटे ग्राम बिंजली के माटी के लाल किसान श्री शम्भूनाथ अड़बड़ परेशान रहत रहिस। काबर के ओ हर करीबन दू लाख के कृषि ऋण अऊ खेती-किसानी के उपयोग बर ट्रैक्टर बर घलोक बैंक ले ऋण ले हे रहिस। वो ये सोच-सोच के परेशान रहिस के वो ये करजा कइसे चुका पाही। फेर किसान मन के हित करइया नवा सरकार के चुने ले अऊ पहलीच बैठका म किसान मन के कृषि ऋण माफी अऊ बढ़े समर्थन मूल्य ढाई हजार रूपिया प्रति क्विंटल म धान खरीदी के एलान के बाद ओखर चेहरा म खुशी आ गइस। ओकर ट्रैक्टर बर ले गए करजा घलोक अब आसानी ले चुकता होही।
माटीपुत्र किसान श्री शम्भूनाथ के माथा ले दुख के लकीर अब मेटर जही। ओ हर ट्रेक्टर के बहुत अकन करजा उतार देहे हे। अब ओला सुख के नींद घलोक आए लगे हे। नवा सरकार ओखर घर-अंगना म बहार लेके आए हे। श्री शम्भू ह चर्चा म बताइस कि करजा माफी अऊ बढ़ाये गये धान समर्थन मूल्य ले बहुत राहत मिले हे। ओखर जइसे कई किसान मन के घलोक करजा माफ होय हे। उमन कहिन कि पहिली करजा के बेचैनी के सेती नींद घलोक नइ आत रहिस। फेर अब किसान हितैषी अऊ सुख-दुख म संग निभाने वाला सरकार के आ जाय ले अब नींद घलोक भरपूर आए लगे हे।
हम आप ल बता देवन कि नारायणपुर जिला म कुल 4272 किसान मन ह कृषि ऋण लेहे रहिन। जेमां ले जिला सहकारी केन्द्रीय बैंक ले 4209 छत्तीसगढ़ ग्रामीण बैक ले 63 किसान मन ह कृषि बर करजा लेहे रहिन। ए प्रकार कृषि ऋण के कुल राशि लगभग 20 करोड़ 24 लाख 13 हजार 865 रहिस।
