रायपुर, स्वास्थ्य मंत्री श्री टी.एस. सिंहदेव ह आज सरगुजा जिला म गहिरा गुरू विश्वविद्यालय ले संबद्ध अभियांत्रिकी महाविद्यालय, लखनपुर म ‘आधुनिक समाज अऊ सामाजिक वातावरण म विज्ञान अऊ प्रौद्योगिकी के भूमिका (Role of Science and Technology in Modern Society and Social Environment)’ विसय म दू दिन के राष्ट्रीय सम्मेलन के शुभारंभ करिस। ए अवसर म उमन कहिन के आदिकाल ले विज्ञान अऊ तकनीक मानव बर जिज्ञासा के विसय रहे हे। आधुनिक समाज ल नवा दिशा देहे म विज्ञान अऊ प्रौद्योगिकी के महत्वपूर्ण भूमिका हे। विज्ञान अऊ तकनीक के माध्यम ले ही मानव समाज विकास के रस्ता म सरलग आगू बढ़त हे।
सम्मेलन के शुभारंभ करत श्री सिंहदेव ह कहिन के आज सोशल मीडिया के माध्यम ले जादा ले जादा मनखे मन तक बहुत कम समय म सूचना संप्रेषित करे जा सकत हे। तकनीक के सही उपयोग जरूरी हे, नइ तो एखर कई दुष्परिणाम घलोक भुगते ल परथे। उमन पर्यावरण संरक्षण ल मानव विकास बर बिक्कट जरूरी बतात अइसे तकनीक मन ल प्रोत्साहित करे के बात कहिन जेखर से पर्यावरण के नुकसान कम ले कम होवय।
सम्मेलन ल गहिरा गुरू विश्वविद्यालय के कुलपति डॉ. रोहिणी प्रसाद, मणिपाल विश्वविद्यालय राजस्थान के कुलपति प्रो. सुभाष चन्द्र शर्मा, शासकीय इंजीनियरिंग कालेज बिलासपुर के प्रो. एम.एल. अग्रवाल, एल.से.आई.टी. बिलासपुर के प्रो. अनिता अग्रवाल, इसरो अहमदाबाद के वैज्ञानिक श्री ऋषितोष कुमार सिन्हा, अमरनाथ मिश्रा स्नातकोत्तर महाविद्यालय बलिया के पहिली प्राचार्य प्रो. गणेश कुमार पाठक अऊ अम्बिकापुर के महापौर डॉ. अजय तिर्की ह घलोक संबोधित करिस। ए मौका म गहिरा गुरू विश्वविद्यालय सरगुजा अऊ अभियांत्रिकी महाविद्यालय लखनपुर के प्राध्यापक अऊ छात्र-छात्रा मन बड़ संख्या म उपस्थित रहिन।
