- हरेली तिहार म रहिही शासकीय अवकाश
- हरेली तिहार मनाए राज्य शासन ह जारी करिस आदेश
रायपुर, हरेली तिहार के अवसर म छत्तीसगढ़ राज्य के सबो जिला मुख्यालय मन म, जनपद मुख्यालय मन म अऊ ग्राम पंचायत मन म सांस्कृतिक कार्यक्रम अऊ ग्रामीण खेलकूद प्रतियोगिता आयोजित करे जाही। सामान्य प्रशासन विभाग कोति ले आदेश जारी करके हरेली तिहार ल व्यापक जनभागीदारी ले मनाए के निर्देश जारी करे गए हे।
इहां ये बताना जरूरी हे कि छत्तीसगढ़ शासन कोति ले छत्तीसगढ़ी संस्कृति के संरक्षण अऊ संवर्धन बर हरेली तिहार बर 1 अगस्त के दिन सामान्य अवकाश के घोषणा करके एक बड़का पहल करे गए हे। हरेली तिहार के संझा कन मुख्य अतिथि के उपस्थिति म छत्तीसगढ़ के लोक परंपरा ल दृष्टिगत रखत सांस्कृतिक कार्यक्रम आयोजित करे जाही। खेलकूद म गेड़ी दौड़, खो-खो, कबड्डी, फुगड़ी, बिल्लस आदि के आयोजन करे जाही। कार्यक्रम स्थल म छत्तीसगढ़ी कलेवा के स्टॉल घलोक लगाए जाही। खेलकूद के विजेता मन ल इनाम तको देहे जाही। प्रतीकात्मक रूप ले हर एक कार्यक्रम म पौधारोपण घलोक करे जाही।
हरेली तिहार के आयोजन म ग्राम्य विकास अऊ ग्रामीण अर्थव्यवस्था ल गति देवइया विभाग पंचायत अऊ ग्रामीण विकास विभाग, कृषि विकास अऊ किसान कल्याण अऊ जैव प्रौद्योगिकी विभाग, संस्कृति विभाग, वन विभाग के संगें-संग जनसंपर्क विभाग कोति ले प्रमुखता ले भागीदारी करे जाही।
हरेली तिहार के अवसर म नवा बने गौठान मन के लोकार्पण मुख्य अतिथि कोति ले गांव वाले मन के उपस्थिति म करे जाही। तिहार के आयोजन बर पंचायत अऊ ग्रामीण विकास विभाग ल नोडल विभाग बनाये गए हे। छत्तीसगढ़ के परम्परा, गौरव ल ध्यान म रखत हरेली तिहार के आयोजन बर जिला कलेक्टर के अध्यक्षता म समिति गठित करे के निर्देश देहे गए हे, जऊन ये बेरा बर छत्तीसगढ़ी सांस्कृतिक कार्यक्रम, छत्तीसगढ़ी खेलकूद, छत्तीसगढ़ी कलेवा के स्टाल अऊ गौठान लोकार्पण के संबंध म कार्यक्रम मन ल आखरी रूप देही।
