मूक बधिर बेटी के नाम ले जमा राशि निकाले म बैंक के आनाकानी, कलेक्टर ल जन चौपाल म मिलीस शिकायत

कोरबा, कलेक्टर श्रीमती किरण कौशल ह मूक बधिर बेटी के नाम ले बैंक म जमा राशि निकाले म बैंक कोति ले आनाकानी करे के मामला म दू दिन म लीड बैंक मैनेजर ले प्रतिवेदन मांगे हे। मामला आज कलेक्टोरेट सभाकक्ष म आयोजित जन चौपाल म कलेक्टर के आगू आइस। खोड्डल गांव के रामेश्वर प्रसाद बघेल के मूक बधिर बेटी रेवती बाई ह अपन पिता के संग कलेक्टर के आगू पहुंचके प्रकरण के पूरा जानकारी आवेदन के रूप म कलेक्टर ल दीस। रेवती बाई ह अपन आवेदन म लिखे हे कि मूक बधिर बेटी के नाम ले बरपाली के भारतीय स्टेट बैंक म 6 लाख रूपिया जमा करे गए हे, जऊन ल उमन उरगा के भारतीय स्टेट बैंक म ट्रांसफर कराए रहिन। आवेदन म ये घलोक लिखे हे कि उरगा के भारतीय स्टेट बैंक म ढाई लाख रूपिया अकतहा जमा करे गए रहिस। जमा राशि जुलाई अऊ अगस्त महिना म परिपक्व होके कुल 13 लाख 94 हजार रूपिया हो गए हे, फेर बैंक बेटी के मूक बधिर होए के सेती पइसा नइ देवत हे। कलेक्टर श्रीमती कौशल ह दिव्यांग बेटी के स्थिति अऊ मामला के संवेदनशीलता ल संज्ञान म लेत तुरंते लीड बैंक मैनेजर ल बुलाके प्रकरण के पूरा जानकारी अऊ करे गए कार्यवाही के प्रतिवेदन दू दिन के भीतर मांगे हे।