जन-चौपाल, भेंट मुलाकात : बहुत अकन जरूरतमंद मन ल मुख्यमंत्री ह मंजूर करिन आर्थिक सहायता राशि

रायपुर, मुख्यमंत्री श्री भूपेश बघेल ह आज इहां अपन निवास म आयोजित जन-चौपाल भेट मुलाकात म रायगढ़ जिला के खरसिया तहसील के ग्राम हालाहुली के सरस्वती महिला स्व सहायता समूह ल स्वेच्छानुदान मद ले एक लाख रूपिया के राशि मंजूर करे हें। ए महिला मन ह स्वरोजगार बर बैंक ले तीन लाख रूपिया के ऋण ले रहिन। महिला मन ह 1.80 लाख रूपिया के राशि जमा करा दिए हें, फेर व्यवसाय म कुछ कठिनाई के सेती ऋण के किश्त जमा नइ कर पावत रहिन। मुख्यमंत्री ह समूह के महिला मन अपन व्यवसाय ल आगू जारी रख सके एखर बर ओ मन ल एक लाख रूपिया के आर्थिक सहायता मंजूर करे हें।
अइसनहे मुख्यमंत्री ह रायपुर जिला के ग्राम अकोली (मांढर) के कुमारी रमेशरीन धीवर ल उंखर दुकान म सामान क्रय बर 25 हजार रूपिया अऊ आरंग के ग्राम केसला के श्री भागवत निषाद ल आर्थिक सहायता के रूप म 25 हजार रूपिया के सहायता स्वीकृत करिन। श्री बघेल ह बलौदा बाजार जिला के भाटापारा के परशुराम वार्ड निवासी श्रीमती शारदा मिश्रा ल उंखर बेटी विभूति मिश्रा के पढ़ाई बर 50 हजार रूपिया के राशि मंजूर करिन। श्रीमती शारदा मिश्रा ह मुख्यमंत्री ल बताइस कि उंखर बेटी बेंगलुरु के रमैया इंस्टीट्यूट ऑफ टेक्नोलॉजी म कंप्यूटर साइंस के पहिली साल के छात्रा हे ओखर फीस अऊ हॉस्टल के खरचा करीबन 40 हजार रूपिया हे। मुख्यमंत्री ह ओ मन ल 50 हजार रूपिया के राशि मंजूर करिन। मुख्यमंत्री ह दुर्ग जिला के पाटन के ग्राम तेलीगुण्डरा निवासी श्रीमती लक्ष्मी बाई साहू ल फैंसी स्टोर बर 20 हजार रूपिया, धमतरी जिला के कुरूद विकासखंड के ग्राम कोडेबोड़ निवासी श्रीमती नंदनी साहू ल आर्थिक सहायता के रूप म दस हजार रूपिया, रायपुर संतोषी नगर के नाना बाई ल 5 हजार रूपिया, रायपुर के उरला निवासी श्री विशाल साहू ल 20 हजार रूपिया, दुर्ग जिला के अहिवारा के ग्राम मुरमुर्दा निवासी श्री लक्ष्मी देवांगन ल 5 हजार रूपिया के सहायता राशि मंजूर करिन।