उद्योग मंत्री ह करिस बुड़दी म गौठान के लोकार्पण
रायपुर, उद्योग मंत्री श्री कवासी लखमा ह कहिन कि राज्य सरकार किसान मन के आय बढ़ाए के दिशा म काम करत हे। ग्रामीण अर्थव्यवस्था ल मजबूत बनाए बर सुराजी गांव योजना के तहत गौठान के निर्माण करे जात हे। ए गौठान मन म ग्रामीण युवा मन अऊ महिला मन ल आयमूलक गतिविधि मन ले जोड़े जाही। उमन कहिन कि सिंचाई सुविधा उपलब्ध कराए बर शबरी नदी के तीरे-तीर बिजली लाईन बिछाए जाही। श्री लखमा आज सुकमा जिला बुड़दी म बने गौठान के लोकार्पण करे के बाद पंच-सरपंच सम्मेलन ल संबोधित करत रहिन।
श्री लखमा ह ये बेरा म कहिन कि श्री भूपेश बघेल के सरकार आम जनता के समस्या मन के निराकरण बर पूरा प्रतिबद्धता के संग काम करत हे। उमन कहिन कि जलवायु म होवत बदलाव के असर खेती-किसानी म घलोक परत हे। अवइया समय म पानी के भीषण समस्या होही अऊ ये समस्या के निराकरण बर अभी नाला मन के बंधान के काम नरवा कार्यक्रम के तहत चालू कर दे गए हे। उमन कहिन कि शबरी नदी के तीर बसे किसान मन ल सिंचाई सुविधा उपलब्ध कराए बर विद्युत लाईन बिछाए जाही। एखर से शबरी नदी के पानी बेकार नइ बोहाही अऊ किसान मन ल मिलइया सिंचाई सुविधा ले फसल उत्पादन बाढ़ही, जेखर से उंखर आय म बढ़ोतरी होही। उमन बताइन कि तेंदूपत्ता संग्राहक ल घलोक अब प्रति मानक बोरा ढाई हजार रुपए ले बढ़ाके चार हजार रुपए देहे गए हे।
उद्योग मंत्री ह नवा बने गोठान के अवलोकन करिन अऊ उहां वर्मी कम्पोस्ट तियार करत महिला स्व-सहायता समूह के सदस्य मन अऊ गांव वाले मन ले बातचीत करिन। उमन कहिन कि गौठान मन के निर्माण ले दुहरी फसल लेवइया किसान मन ल फसल चराई के समस्या ले निजात मिलही। उमन बताइस कि गौठान मन म छोटे वनोपज के संग्रहण होही। एखर से वनांचल म छोटे वनोपज के संग्रहण करइया ल सही कीमत मिलही। ये बेरा म उमन अधिकारी मन ल गोठान तीरेच तालाब के निर्माण करके मछलीपालन चालू करे अऊ महिला मन ल मुर्गीपालन जइसे रोजगारमूलक गतिविधि मन ले जोड़े के निर्देश दीन। अधिकारी मन ह बताइन कि इहां जल्दीच महिला मन ल मशरुम उत्पादन के काम ले घलोक जोड़े जाही अऊ पौधा मन के रक्षा बर ट्री गार्ड बनाए बर बांस घलोक उपलब्ध कराए जाही। श्री लखमा ह ये बेरा म क्षेत्रीय विकास बर स्वीकृत कई ठन निर्माण काम मन के जानकारी दीन।
