- – महकाखुर्द गांव म कोसरिया यादव महासभा के कार्यक्रम म पहुंचे मुख्यमंत्री श्री भूपेश बघेल के पारंपरिक तरीका ले समाज के सदस्य मन ह करिन स्वागत
- – मुख्यमंत्री ह घलोक जय यादव!, जय माधव! के नारा लगा के भगवान कृष्ण ल करिस नमन, गीता जयंती के होइस कार्यक्रम
दुर्ग, कोसरिया यादव महासभा कोति ले आयोजित गीता जयंती कार्यक्रम म भाग लेहे पहुंचे मुख्यमंत्री श्री भूपेश बघेल ल समाज के सदस्य मन ह खुमरी पहिराईस, लाठी दीस अऊ कहिन चिंहौर पतरी ला रखे रहिबे। मुख्यमंत्री ह घलोक भगवान कृष्ण ल नमन करत जय माधव!, जय यादव! के नारा लगाइन। मुख्यमंत्री ह ये बेरा म कहिन कि गीता हमार जीवन के कठिन परिस्थिति मन म घलोक सहीं रद्दा देखाथे। ये दिव्य ग्रंथ म अर्थपूर्ण अऊ यशस्वी जीवन बर बहुमूल्य जीवन दर्शन हे।
मुख्यमंत्री ह कहिन कि भगवान कृष्ण ले बड़का कोनो आंदोलनकारी नइ रहिन। उमन अन्याय के प्रतिरोध बर मनखे मन ल तियार करिन अऊ उंकर नेतृत्व करिन। मुख्यमंत्री ह कहिन कि भगवान कृष्ण ह मनखे मन ले कहिन कि गोवर्धन पर्वत के हम मान करबोन काबर के ओखर से पशु मन ल चारा अऊ जलाऊ लकड़ी मिलथे। इंद्र ए बात ले गुसिया गईन त कृष्ण जी गोवर्धन पर्वत ल उठाके मनखे मन ल आसरा दीन। उमन बताइन कि भगवान कृष्ण के जीवन ले हम सीख सकत हन कि पहिली अपन संसाधन मन के विकास खुदे बर करन ताकि न्याय के लड़ाई बर मजबूत हो सकन।
मुख्यमंत्री ह कहिन कि सरकार किसान मन ल धान के 2500 रूपिया कीमत देवाए बर बचन देहे हे। अभी 1815 अऊ 1835 रूपिया म खरीदी करत हन। बांचे पईसा बजट म योजना लाके अलग रूप ले किसान मन के खाता म दीए जाही। मुख्यमंत्री ह कहिन कि केंद्र सरकार ले सरलग गिलौली करे हन के बोनस देहे म चांउर नइ लेहे के शर्त ल हटा देवव ताकि किसान मन ल तुरंते 2500 रूपिया भुगतान करे जा सकय।
ये मौका म विधायक अउ भिलाई महापौर श्री देवेंद्र यादव घलोक उपस्थित रहिन।
