- आयोजन स्थल म दिखही छत्तीसगढ़ के संस्कृति, पर्यटन अऊ औद्योगिक परिदृश्य मन के झांकी
- मुख्यमंत्री श्री भूपेश बघेल ह महोत्सव के तैयारी मन के समीक्षा करिन
रायपुर, राष्ट्रीय आदिवासी नृत्य महोत्सव के शुभारंभ भव्य अऊ आकर्षक होही। शुभारंभ अवसर म देश-विदेश ले आए कलाकार मन अपन पारम्परिक परिधान म मार्च पास्ट करहीं। महोत्सव म लोक रंग म रंगे सांस्कृतिक कार्यक्रम मन के आयोजन साईंस कॉलेज मैदान म 27 ले 29 दिसम्बर तक बिहनिया 10 बजे ले संझा 8.30 बजे तक रोजेच होही। ये महोत्सव म देश के 23 राज्य मन के 151 दल मन के करीबन 1400 कलाकार भाग लेहीं। एखर अलावा महोत्सव म श्रीलंका, बेलारूस, युगांड़ा, बांग्लादेश संग छै देश मन के कलाकार घलोक सामिल होही। मुख्यमंत्री श्री भूपेश बघेल ह आज अपन निवास कार्यालय म आयोजित बैठक म 27 दिसम्बर ले शुरू होवत राष्ट्रीय आदिवासी नृत्य महोत्सव के तैयारी मन के समीक्षा करिन। बैठक म नगरीय प्रशासन मंत्री डॉ. शिवकुमार डहरिया घलोक मौजूद रहिन।
मुख्यमंत्री ह कहिन कि राष्ट्रीय आदिवासी नृत्य महोत्सव म देश के आन राज्य मन के संगेच देश के बाहिर ले घलोक कलाकार आहीं, ऊंखर बर जरूरी सुरक्षा व्यवस्था, भोजन, घर, साफ-सफाई, पीए के साफ पानी, स्वास्थ्य सुविधा, अग्निशमन अऊ आवागमन के समुचित साधन मुहैया कराए के निर्देश संबंधित अधिकारी मन ल दीन।
मुख्यमंत्री ह साईंस कॉलेज स्थित आयोजन स्थल के कम्प्यूटर आधारित प्रेजेंटेशन देखिन अऊ जरूरी निर्देश घलोक दीन। उमन कहिन कि ये महोत्सव म अवइया दर्शक मन ल कोनो असुविधा नइ होनी चाही। पार्किंग स्थल ले उमन ल कम से कम चलना परय एकर विशेष ध्यान रखव। आयोजन म जरूरी व्यवस्था बर एनसीसी, एनएसएस अऊ स्काउट गाइड के कैडेट मन के घलोक सहयोग लेहे बर कहिन।
संस्कृति विभाग के सचिव श्री सिद्धार्थ कोमल परदेशी ह बताइस कि महोत्सव म कलाकार मन कोति ले विवाह, फसल कटाई, पारंपरिक त्यौहार अऊ आन अवसर मन म जउन आदिवासी नृत्य करे जाथे तेकर प्रदर्शन करे जाही। महोत्सव म विजेता भाग लेवईया मन ल समापन अवसर म पुरस्कार दे जाही, जेमां पहिली पुरस्कार 5 लाख रूपिया, दूसर पुरस्कार 3 लाख रूपिया, तीसर पुरस्कार 2 लाख रूपिया अऊ सांत्वना पुरस्कार के रूप म 25 हजार रूपिया दिए जाही। हर एक दल म करीबन 50 कलाकार होही। श्री परदेशी ह बताइस कि महोत्सव म कलाकार मन के ऑनलाइन पंजीयन के व्यवस्था करे गए हे अऊ अब तक एक हजार 310 कलाकार मन के पंजीयन हो चुके हे। पंजीयन ल ऑनलाइन देखे घलोक जा सकत हे। आयोजन स्थल म करीबन 4000 मनखे मन के बैठक व्यवस्था करे जात हे। आयोजन स्थल म शिल्प ग्राम, फूड जोन, पुस्तक प्रदर्शनी, वनोपज उत्पाद, औद्योगिक प्रोत्साहन, छत्तीसगढ़ के इतिहास, पर्यटन, संस्कृति, छत्तीसगढ़ी व्यंजन, गांधी यात्रा, जल, जंगल, जमीन आदि के प्रदर्शनी लगाए जाही। संगेच मनोरंजन बर मीना बाजार लगाय बर घलोक विचार करे जात हे।
बैठक म अकतहा मुख्य सचिव श्री अमिताभ जैन, पुलिस महानिदेशक श्री डी.एम. अवस्थी मुख्यमंत्री के प्रमुख सचिव श्री गौरव द्विवेदी, प्रमुख सचिव श्री मनोज पिंगुआ, श्री सुब्रत साहू, सचिव श्री पी.अन्बलगन संग वरिष्ठ अधिकारी उपस्थित रहिन।
