राज्यपाल विवाह योग्य गोंड़ युवक-युवति मन के परिचय सम्मेलन म होइन सामिल
रायपुर, राज्यपाल सुश्री अनुसुईया उइके आज टिकरापारा के गोंडवाना भवन म क्षेत्रीय गोंड़ समाज कल्याण समिति रायपुर कोति ले आयोजित विवाह योग्य गोंड़ युवक-युवति मन के परिचय सम्मेलन म सामिल होइन। उमन ये बेरा म परिचय सम्मेलन म आए युवक-युवति मन ल शुभकामना दीन।
राज्यपाल ह कहिन कि पहिली आदिवासी समाज के मनखे जागरूक नइ रहिन अऊ अब समाज म शिक्षा के प्रसार होवत हे। आन समाज के जइसे अब आदिवासी समाज म घलोक लड़का-लड़की ल अपन पसंद के जीवन साथी चुने के अवसर देहे बर परिचय सम्मेलन आयोजित करे जात हे, जऊन एक सराहनीय प्रयास हे। राज्यपाल ह कहिन कि कहूं समाज ल आगू बढ़ाना हे अऊ सशक्त करना हे त संविधान म देहे गए अधिकार मन ल पाए बर सबो ल दलगत भावना ले उठके काम करे के जरूरत हे। उमन आदिवासी समाज ले कहिन कि ओ मन खुद आगू आवयं अऊ समाज ल जागरूक करयं, तभे आदिवासी समाज आगू बढ़ही। सुश्री उइके ह कहिन कि वैभवशाली आदिवासी संस्कृति, परम्परा अऊ रीति-रिवाज ले नवा पीढ़ी ल अवगत करावव ताकि आदिवासी संस्कृति पीढ़ी दर पीढ़ी बने रहि सकय। उमन बताइस कि आदिवासी महिला मन म गोदना गुदवाए के प्रथा रहे हे, जेखर से बी.पी. कंट्रोल रहिथे। राज्यपाल ह चालू म कुपार लिंगो देवालय के लोकार्पण करिन।
ये बेरा म क्षेत्रीय गोंड़ समाज कल्याण समिति रायपुर के अध्यक्ष श्री जग्गु सिंह ठाकुर, रायपुर के कमिश्नर श्री जी.आर. चुरेन्द्र, पुलिस महानिरीक्षक श्री पुरूषोत्तम गौतम, श्री फूल सिंह ठाकुर, श्रीमती आशा ध्रुव संग गोंड़ आदिवासी समाज के पदाधिकारी अऊ अड़बड़ झन म युवक-युवती, महिला अऊ पुरूष उपस्थित रहिन।
