मुख्यमंत्री श्री बघेल ह लोक गायक श्री मिथलेश साहू के निधन म शोक व्यक्त करिन

रायपुर, मुख्यमंत्री श्री भूपेश बघेल ह छत्तीसगढ़ के सुप्रसिद्ध लोक गायक श्री मिथलेश साहू के आकस्मिक निधन म गहरा दुख व्यक्त करे हें। श्री साहू के आज रायपुर के एक निजी अस्पताल म निधन हो गीस। श्री बघेल ह अपन शोक संदेश म कहिन हे कि श्री मिथलेश साहू के निधन मोर बर व्यक्तिगत क्षति हे। श्री साहू के संग मोर पारिवारिक संबंध रहे हे। मुख्यमंत्री ह कहिन कि स्वर्गीय श्री मिथलेश साहू ल पारंपरिक छत्तीसगढ़ी गीत के गायन म विशेष महारत हासिल रहिस। ओ मन छत्तीसगढ़ी लोककला के प्रति बेहद समर्पित कलाकार रहिन। उमन आजीवन छत्तीसगढ़ी कला के सेवा करे हें। ओ मन अपन सुमधुर अवाज म छत्तीसगढ़ी गीत मन के संग छत्तीसगढ़ी संस्कृति ल मया करइया मनखे मन के बीच विशेष पहिचान रखत रहिन। मुख्यमंत्री श्री बघेल ह स्वर्गीय श्री मिथलेश साहू के शोक संतप्त परिवारजन के प्रति गहरी संवेदना प्रकट करत दिवंगत आत्मा के शांति बर ईश्वर ले प्रार्थना करे हें। हम आप ल बता देवन के स्वर्गीय श्री मिथलेश साहू गरियाबंद जिला के ग्राम बारूका के निवासी रहिन।