– पाटन ब्लॉक के देमार गांव म शासकीय चंदूलाल चंद्राकर महाविद्यालय पाटन के एनएसएस कैडेट्स बनिन पैरादान अभियान म भागीदार
दुर्ग, गौठान मन बर पैरादान अभियान म गांव वाले मन के संगे-संग युवा वर्ग घलोक अपन भागदारी निभावत हें। इही कड़ी म आज शासकीय चंदूलाल चंद्राकर महाविद्यालय पाटन के एनएसएस कैडेट्स मन ह ग्राम पंचायत देमार म चलत पैरादान अभियान म श्रमदान करिन। एनएसएस के छात्र छात्रा मन ह पैरादान के बाद सकलाए पैरा ल सहेजे अऊ गौठान तक पहुंचाए के काम करिन।
भिनसरहा ले ही एनएसएस के छात्र अउ छात्रा मन ह खेत मन म जाके पैरा सहेज के ट्रैक्टर म भरके गौठान तक पहुंचाइन। गांव वाले मन ह छात्रा मन के उछाह ल अड़बड़ सहराइन। इहां आए छात्र अउ छात्रा मन म ले जादा मन शहर के रहवईया यें। छत्तीसगढ शासन कोति ले महत्वाकांक्षी योजना नरवा, गरूवा, घुरवा, बाड़ी योजना के तहत गांव म गौठान बनाके पशु मन के देख-भाल करे जात हे। जेखर बर चारा-पानी के जरूरत होथे। दानवीर किसान मन कोति ले पैरादान करके गौठान के मवेसी मन बर चारा तको उपलब्ध कराए जात हे।
एनएसएस के छात्र अउ छात्रा मन ह आज ग्राम पंचायत देमार के सरंपच श्री गजपाल के सियानी म पैरा सहेजे बर निकलिन। गांव वाले मन छात्र छात्रा मन ल पैरा सहेजे के तरीका घलोक सिखाइन। एखर बाद सबो कैडेट्स पैरा के बोझा बनाके ट्रैक्टर म डालके गौठान तक पहुंचाइन।
हम आप ल बता देवन के ग्राम पंचायत देमार म किसान श्री गजधार प्रसाद वर्मा कोति ले 75 क्विंटल पैरा दान करे गीस जऊन ल कैडेट्स मन ह गौठान तक लाइन। एखर अलावा शासकीय चंदूलाल चंद्राकर महाविद्यालय पाटन के छात्र अउ छात्रा मन ह स्वच्छता के संदेश देवत गली मन अऊ तालाब के तिर-तखार के सफाई करिन। कैडेट्स मन ह गांव म स्वच्छता रैली घलोक निकालिन। ये बेरा म विसय खांटी जानकार कोति ले कैडेट्स अऊ गांव वाले मन ल सांस्कृतिक प्रस्तुति के माध्यम ले गांव वाले मन ल नरवा, गरूवा, घुरवा, बाड़ी योजना के तहत के जानकारी तको दीन।
