रायपुर, मुख्यमंत्री श्री भूपेश बघेल ह कहिन के प्रदेश सरकार बाबा गुरू घासीदास के बताये रद्दा अऊ सिद्धांत उपर चलत हे। गुरू घासीदास बाबा ह पूरा मानवता ल सत्य, अहिंसा, प्रेम, शांति अउ भाईचारा के रद्दा देखाए हे। बाबा ह मनखे-मनखे एक समान के संदेश दीन। राज्य सरकार ह काम संभालतेच सबले पहिली काम किसान मन ले करे गए वादा, करजा माफी ल पूरा करिस। 2500 रूपिया प्रति क्विंटल के दर ले समर्थन मूल्य म धान खरीदी करिस। श्री बघेल आज बेमेतरा जिला के नवागढ़ म आयोजित राज्य स्तरीय गुरू घासीदास जयंती समारोह ल सम्बोधित करत रहिन।
मुख्यमंत्री श्री भूपेश बघेल ह ये बेरा म आयोजित ओपन पंथी नृत्य प्रतियोगिता के विजेता टीम मन ल आयोजक मन के तरफ ले पुरस्कार वितरित करिन, पहिली पुरस्कार ग्राम मुड़िया जिला मुंगेली पंथी नर्तक दल ल एक लाख 51 हजार रूपिया, दूसर पुरस्कार ग्राम चारभाठा बेमेतरा ल एक लाख 10 हजार अउ तीसर पुरूस्कार उतई जिला दुर्ग ल 75 हजार प्रदान करिन। मुख्यमंत्री ह नवागढ़ म गुरू घांसीदास जयंती समारोह हर एक साल मनाए जाय के घोषणा करिन।
विशिष्ट अतिथि के रूप म प्रदेश के गृहमंत्री श्री ताम्रध्वज साहू, कृषि मंत्री श्री रविन्द्र चौबे, विधायक बेमेतरा श्री आशीष छाबड़ा अउ चंद्रपुर विधायक श्री रामकुमार यादव उपस्थित रहिन। विधायक नवागढ़ श्री गुरूदयालसिंह बंजारे के नेतृत्व म जम्मो सतनामी समाज क्षेत्र नवागढ़ कोति ले ये समारोह के आयोजन करे गीस। आयोजन समिति के तरफ ले मुख्यमंत्री संग अतिथि मन ल पगड़ी पहिनाके स्वागत करे गीस। नगर पंचायत नवागढ़ के नवनिर्वाचित पार्षद मन ह विशाल फूल माला ले मुख्यमंत्री के अभिनंदन करिन। हेलीकॉप्टर ले उतरतेच मुख्यमंत्री अउ अतिथि मन ह जोड़ा जैतखाम जाके पूजा-अर्चना करिन।
मुख्यमंत्री ह कहिन कि पूरा भारत म धान के सबले जादा कीमत देवइया राज्य छत्तीसगढ़ हे। अइसनहे तेंदूपत्ता श्रमिक मन ल 4000 रूपिया प्रति मानक बोरा के दर ले भुगतान करे जात हे। प्रदेश म सार्वभौम पी.डी.एस. के जरिये सबो ल 35 किलोग्राम चावल हर महिना देहे जात हे। मुख्यमंत्री ह ये घलोक कहिन कि हमार पुरखा मन ह समृद्ध अउ खुशहाल छत्तीसगढ़ के सपना देखे रहिन। हमर सरकार प्रदेश के किसान, मजदूर अनुसूचित जाति, अनुसूचित जनजाति, युवा, महिला मन संग सबो वर्ग के खुशहाली बर काम करत हे। मुख्यमंत्री ह किसान मन ल भरोसा देवत कहिन कि किसान मन ल धान खरीदी के प्रति क्विंटल 25 सौ रूपिया के दर ले ही भुगतान करे जाही। किसान मन के मन म कोनो प्रकार के संशय नइ होना चाही। ये बात हमन विधानसभा म घलोक कहे हन अऊ आज नवागढ़ के विशाल जन समुदाय के बीच दोहरावत हंव।
एखर बर कृषि मंत्री श्री रविन्द्र चौबे के अध्यक्षता म एक कमेटी गठित कर दिए गए हे, जेमां केबिनेट मंत्री मोहम्मद अकबर, डॉ. प्रेमसाय सिंह, अमरजीत भगत अउ उमेश पटेल सदस्य हे। मुख्यमंत्री ह कहिन कि प्रदेश सरकार कोति ले 32 लाख मिट्रिक टन चावल केन्द्रीय पूल म खरीदे के अनुरोध करे रहिस ये मा केन्द्र कोति ले स्पष्ट सहमति नइ दिए जात हे। प्रदेश के किसान कड़ा मेहनत करके अन्न उपजाथे। अन्न के अपमान हम बर्दाश्त नइ करन।
गृहमंत्री श्री साहू ह कहिन कि बाबा गुरू घासीदास जी ह पूरा दुनिया ल मानवता के रद्दा देखाईन। बाबा ह सत्य ही ईश्वर हे अऊ ईश्वर ही सत्य हे के संदेश दीन। बाबा के बताये रद्दा म चलके ही हम समाज अउ देश ल आगू बढ़ा सकत हन। कृषि मंत्री श्री चौबे ह कहिन कि कई बछर बाद नवागढ़ म बहुत ही भव्य कार्यक्रम देखे के मौका मिलीस, बाबा गुरू घासीदास ह सत्य, अहिंसा, शांति के रद्दा देखाइन, प्रदेश सरकार बाबा के बताये रद्दा म चलत हे। छत्तीसगढ़ ल शांति के टापू कहे जाथे। इहां सबो आपस म मिल जुलके रहिथें सामाजिक सद्भाव, आपसी प्रेम अउ भाईचारा छत्तीसगढ़ के पहिचान हे। विधायक बेमेतरा श्री छाबड़ा अऊ विधायक श्री गुरूदयाल बंजारे ह घलोक अपन विचार प्रकट करिन। ये बेरा म बहुत अकन जनप्रतिनिधि संग बड़ संख्या म आम नागरिक अउ आयोजन समिति के पदाधिकारी उपस्थित रहिन।
