मुख्यमंत्री नगर निगम राजनांदगांव महापौर के पदभार ग्रहण समारोह म होइन सामिल
रायपुर, मुख्यमंत्री श्री भूपेश बघेल ह कहिन के प्रदेश सरकार कोति ले आम जनता के हित म करे गए काम मन के फलस्वरूप नगरीय निकाय आम चुनाव म ऐतिहासिक सफलता मिले हे। ये प्रदेश सरकार के एक साल के कार्यकाल के उपलब्धि ये। एकर श्रेय शहरी जनता के आशीर्वाद, सबके एकजुटता अऊ मेहनत ल जाथे। श्री बघेल आज राजनांदगांव नगर निगम के महापौर श्रीमती हेमा देशमुख के पदभार ग्रहण कार्यक्रम ल मुख्य अतिथि के आसंदी ले संबोधित करत रहिन। श्री बघेल ह स्थानीय पद्मश्री गोविंदराम निर्मलकर ऑडिटोरियम म आयोजित ये समारोह म नगर निगम राजनांदगांव के महापौर, अध्यक्ष अऊ पार्षद मन ल बधाई अउ शुभकामना देवत कहिन कि बड़े जीत बड़े उम्मीद घलोक लेके आथे। उम्मीद के बढ़े ले जिम्मेदारी घलोक बाढ़ जाथे।
समारोह म वन मंत्री अऊ जिला के प्रभारी श्री मोहम्मद अकबर, गृह मंत्री श्री ताम्रध्वज साहू, कृषि मंत्री श्री रविन्द्र चौबे, महिला अउ बाल विकास मंत्री श्रीमती अनिला भेंड़िया, राज्य सभा सांसद श्रीमती छाया वर्मा, विधायक खुज्जी श्रीमती छन्नी साहू, विधायक डोंगरगढ़ श्री भुनेश्वर बघेल संग बहुत अकन जनप्रतिनिधि सामिल होइन।
मुख्यमंत्री श्री भूपेश बघेल ह समारोह म महापौर श्रीमती हेमा देशमुख अऊ अध्यक्ष श्री हरिनारायण धकेता ल पदभार ग्रहण स्वरूप प्रमाण पत्र सौंपिन। सबो अतिथि मन ह अपन उद्बोधन म नगर निगम राजनांदगांव के पदाधिकारी मन अऊ पार्षद मन ल बधाई अउ शुभकामना दीन। महापौर श्रीमती हेमा देशमुख ह अपन स्वागत उद्बोधन म गढ़बो नवा छत्तीसगढ़ के तर्ज म गढ़बो नवा राजनांदगांव के नारा दीन। मुख्यमंत्री श्री बघेल ह अपन उद्बोधन म आगू कहिन कि छत्तीसगढ़ संत-महात्मा मन के जन्म भूमि अऊ कर्म भूमि ये। इही संत महात्मा मन के पुण्य प्रताप ले छत्तीसगढ़ शांतिप्रिय प्रदेश बने हुए हे। भाईचारा अऊ सामाजिक सद्भाव छत्तीसगढ़ के संस्कृति ये। श्री बघेल ह कहिन कि जिहां शांति हे, उहें विकास होथे। पाछू एक साल म छत्तीसगढ़ म हर वर्ग के विकास बर योजना बनाके काम करे गए हे। श्री बघेल ह कहिन कि ’गढ़बो नवा छत्तीसगढ़’ ध्येय वाक्य के पीछू हमर मंशा छत्तीसगढ़ के ढाई करोड़ जनता के उत्थान करे के हे। इहां के मनखे मन के स्वास्थ्य, रोजगार, आवास, शिक्षा अऊ भोजन के व्यवस्था करना ’गढ़बो नवा छत्तीसगढ़’ के मुख्य उद्देश्य हे। श्री बघेल ह कहिन कि छत्तीसगढ़ के 37 प्रतिशत लइका अऊ 41 प्रतिशत महिला मन कुपोषित श्रेणी म आथें। गरीब जनता बर भोजन के व्यवस्था करे बर हर परिवार ल राशन कार्ड के दायरा म लाए गए हे। मुख्यमंत्री ह कहिन कि गरीब तबका ल सुविधा देहे बिजली बिल हॉफ करे गए हे। उमन कहिन कि जब छत्तीसगढ़ म बिजली पैदा होथे त ये प्रदेश के जनता ल ये संसाधन के उचित लाभ मिलना ही चाही। मुख्यमंत्री श्री बघेल ह ये बेरा म छत्तीसगढ़ के चार चिन्हारी नरवा, गरवा, घुरवा अऊ बारी योजना म केन्द्रित पुस्तिका के विमोचन तको करिन।
वन मंत्री श्री मोहम्मद अकबर ह कहिन कि राज्य सरकार के योजना अऊ सबो के एकजुट प्रयास ले नगर निगम राजनांदगांव म शानदार सफलता मिले हे। प्रदेश सरकार ह गरीब मन के कल्याण बर जऊन काम करे हवन, वोखर परिणाम आज सबके आगू हे। गृह मंत्री श्री ताम्रध्वज साहू ह कहिन कि जनप्रतिनिधि मन ल एक स्पष्ट सोच के संग राजनांदगांव ल विकास के नवा मुकाम तक पहुंचाना हे। कृषि मंत्री श्री रविन्द्र चौबे ह कहिन कि मुख्यमंत्री शहरी स्लम स्वास्थ्य योजना अऊ वार्ड कार्यालय योजना पूरा सफलता ले चलत हे। महिला अउ बाल विकास मंत्री श्रीमती अनिला भेंड़िया ह कहिन कि नगर निगम के पदाधिकारि मन अऊ पार्षद मन ल जनता ह विश्वास के संग अपन प्रतिनिधि चुने हे। ओ मन ल ये विश्वास म खरा उतर के काम करना होही। राज्य सभा सांसद श्रीमती छाया वर्मा अऊ श्रीमती फूलो देवी नेताम ह घलोक ये बेरा म अपन विचार व्यक्त करिन। महापौर श्रीमती हेमा देशमुख ह नवा साल के बधाई अउ शुभकामना देवत संस्कारधानी राजनांदगांव म सबके अभिनंदन करिन।
समारोह के शुरूआत म राज्य गीत ’अरपा पैरी के धार-महानदी हे अपार’ के गायन करे गीस। ऑडिटोरियम म उपस्थित सबो मनखे मन ह खड़े होके राज्यगीत के सम्मान करिन। आभार प्रदर्शन नगर निगम राजनांदगांव के अध्यक्ष श्री हरिनारायण धकेता ह करिस। ये बेरा म छत्तीसगढ़ राज्य अल्प संख्यक आयोग के सदस्य श्री हफीज खान, राजगामी संपदा न्यास के अध्यक्ष श्री विवेक वासनिक संग स्थानीय जनप्रतिनिधि अऊ आम नागरिक घलोक बड़ संख्या म उपस्थित रहिन।
