- गणतंत्र दिवस म मुख्यमंत्री के तीन बड़का घोषणा:
- अवइया शिक्षा सत्र ले प्राथमिक शाला मन म छत्तीसगढ़ी, गोंडी, हल्बी, भतरी, सरगुजिया, कोरवा, पांडो, कुडुख, कमारी म घलोक होही पढ़ाई के व्यवस्था
- स्कूल मन म करे जाही संविधान के प्रस्तावना के वाचन
- छत्तीसगढ़ के महान विभूति मन के जीवनी उपर परिचर्चा जइसे आयोजन होही स्कूल मन म
रायपुर, 26 जनवरी 2020। मुख्यमंत्री श्री भूपेश बघेल ह आज बस्तर संभाग के मुख्यालय जगदलपुर के लालबाग परेड मैदान म आयोजित गणतंत्र दिवस के मुख्य समारोह म ध्वजारोहण करके परेड के सलामी लीन। ये बेरा म उमन जनता के नाम अपन संदेश म कहिन कि गणतंत्र के सफलता के कसौटी जनता ले सीखके, उंखर भागीदारी ले, ऊंखर सपना ल पूरा करे म हे। श्री बघेल ह प्रदेशवासी मन ल देश के 71वां गणतंत्र दिवस के शुभकामना देवत कहिन कि मोला ये कहे म कोनो संकोच नइ हे कि छत्तीसगढ़ के माटी अऊ छत्तीसगढ़ के जनता ले बड़का कोनो पाठशाला नइ हे। मैं जै पइत बस्तर आथंव, सरगुजा जाथंव या गांव-गांव के दौरा करथंव त हर पइत मोला कोनो नवा सीख जरूर मिलथे। लोहण्डीगुड़ा ह हमला आदर्श पुनर्वास कानून के पालन के सीख दीस त आदवासी मन के जमीन वापसी ले छत्तीसगढ़ सरकार ल अपार यश मिलीस। कुपोषण मुक्ति बर नवाचार अऊ दृढ़संकल्प के शुरूआत दंतेवाड़ा ले होइस। बीजापुर ह दूरस्थ अंचल मन म स्वास्थ्य सुविधा पहुंचाए के प्रण दीस। सुकमा अऊ बस्तर जिला म फूडपार्क, कोण्डागांव म मक्का प्रोसेसिंग इकाइयां लगाय के जज्बा दीस।
मुख्यमंत्री ह छत्तीसगढ़ी म सम्बोधन के शुरूआत करत कहिन कि जम्मो संगी-जहुंरिया, सियान-जवान, दाई-बहिनी अऊ लइका मन ला जय जोहार, 71वां गणतंत्र दिवस के पावन बेरा मं आप मन जम्मो मन ल बधाई अउ सुभकामना देवत हंव।
