रायपुर, 20 फरवरी 2020। प्रदेशव्यापी मुख्यमंत्री सुपोषण अभियान ले कई कुपोषित लइका मन ल स्वस्थ जीवन मिले हे, ओमां ले एक हे दुर्ग जिला के एक साल के नान्हे अनन्या यादव। भिलाई-3 के रहइया अनन्या के चेहरा के मुस्कान देखके अन्दाजा लगाना मुश्किल हे कि सिरिफ चार महिना पहिली ये बच्ची गंभीर कुपोषण के शिकार रहिस। सरलग देखरेख ले कुमारी अनन्या सिरिफ चार महीना म कुपोषण ल मात देके अब सेहतमंद जिन्दगी जीवत हे।
जिला कार्यक्रम अधिकारी ह बताइस कि आंगनबाड़ी मन म कार्यकर्ता मन के लगन अऊ सुपरवाइजर अऊ परियोजना अधिकारी के सरलग देख-रेख ले अच्छा नतीजे आगू म आवत हे। कुमारी अनन्या के प्रकरण बिकट चुनौती भरे रहिस। सरलग देखरेख ले कम समय म ही अनन्या ल कुपोषण के जाल ले मुक्त करे जा सके हे। उमन बताइस के अनन्या जनम ले ही अड़बड़ कमजोर रहिस। 6 नवम्बर 2018 के जनम के समय ओखर वजन सिरिफ 1 किलो 600 किलोग्राम रहिस। आंगनबाड़ी केन्द्र भिलाई-3 के कार्यकर्ता श्रीमती अनिता साहू ल जब एकर पता चलिस त वो तुरंते गृहभेंट बर गीस अऊ परिवार वाले मन ल लइका के सेहत के संबंध म समझाईश दीन। संगेच एकीकृत बाल विकास योजना के तहत अनन्या के पंजीयन करके ओला लाभान्वित करना सुरू करिन।
गांधी जयंती 2 अकटूबर 2019 के मुख्यमंत्री सुपोषण अभियान के शुरुआत होइस तब अनन्या करीबन 11 महिना के रहिस अऊ ओखर वजन करीबन 6 किलोग्राम रहिस। आंगनबाड़ी कार्यकर्ता ह नोनी ल मुख्यमंत्री सुपोषण अभियान के तहत चिन्हाकित करिन अऊ ओला बाल संदर्भ शिविर म लेके गीन। शिविर म डॉक्टर ह अनन्या के स्वास्थ्य जॉच के बाद ओला पोषण पुर्नवास केन्द्र म रखे के सलाह दीन। संगेच ओला मल्टीविटामिन, आयरन-कैल्शियम सिरप अऊ दुसर जरुरी दवई दीन। 15 दिन तक पोषण पुर्नवास केन्द्र म रहे के बाद अनन्या के स्वास्थ्य म काफी सुधार होइस। एखर बाद अनन्या ल आंगनबाड़ी केन्द्र म नियमित रूप ले पोषण आहार के रूप म प्रोटीनयुक्त चिक्की, मौसमी फल, दलिया, अण्डा, राजगीर के लड्डू, अंकुरित अनाज आदि दे गीस। संगेच घर म घलोक प्रोटीनयुक्त पौष्टिक आहार जइसे अण्डा, दार आदि देहे के सलाह दिए गीस। नतीजा यम होइस के अनन्या के वजन लगातार बाढ़े लगिस अऊ ओखर सेहत सुधरे लगिस। फरवरी के पहिली हप्ता म जब अनन्या के वजन करे गीस तो अनन्या के वजन 7 किलो 900 किलोग्राम पाए गीस अऊ वो सामान्य के श्रेणी म आ गीस। अब अनन्या म कुपोषण के सेती आए चिड़चिड़ाहट घलव दूर हो गीस अऊ चेहरा म खिलखिलाहट साफ नजर आए लगे हे।
