- किसान मन बर राजीव गांधी किसान न्याय योजना: 5100 करोड़ रूपिया के प्रावधान: किसान मन ल मिलही समर्थन मूल्य के
अंतर के राशि - दू साल के सेवा पूरा कर डरे शिक्षाकर्मी मन के 1 जुलाई 2020 ले संविलियन
- साल 2020-21 बर कोनो नवा कर प्रस्तावित नहीं
- डॉ. खूबचंद बघेल स्वास्थ्य सहायता योजना बर 550 करोड़ अऊ मुख्यमंत्री विशेष स्वास्थ्य सहायता योजना बर 50 करोड़ के
प्रावधान - बेमेतरा, जशपुर, धमतरी अऊ बालोद जिला के अर्जुंदा म उद्यानिकी महाविद्यालय अऊ लोरमी म कृषि महाविद्यालय के
घोषणा - तोँगपाल, कुँआकोण्डा म छात्रावास संग नवा महाविद्यालय: सुकमा, कोण्डागांव, रायणपुर, बीजापुर अऊ तखतपुर म कन्या
महाविद्यालय खुलही - इंदिरा गांधी कृषि विश्वविद्यालय म होही खाद्य प्रौद्योगिकी संस्थान के स्थापना
- राजपुर (धमधा) म फिशरीज पॉलिटेक्निक के स्थापना
- बेमेतरा अऊ तखतपुर म खुलही डेयरी डिप्लोमा महाविद्यालय
- सिंचाई परियोजना मन बर 1893 करोड़ रूपिया के प्रावधान
- गिरौदपुरी म गुरूकुल विद्यालय के स्थापना, कंडेल म महाविद्यालय
- 3 इंजीनियरिंग कॉलेज अऊ 5 पॉलिटेक्निक कॉलेज म इंटरनेट ऑफ थिंग्स अऊ रोबोटिक्स के प्रयोगशाला म शोध बर
रायपुर 03 मार्च 2020। मुख्यमंत्री श्री भूपेश बघेल ह आज विधानसभा म वित्तीय साल 2020-21 के बजट प्रस्तुत करिस। श्री बघेल ह कहिन कि ये संजीवनी बजट ये। प्रदेश के अर्थ व्यवस्था बर, गांव मन अऊ किसान मन बर, शिक्षा ले लेके स्वास्थ्य तक अऊ आम जनता ले लेके हरेक वर्ग बर ये बजट संजीवनी बजट साबित होही। बजट म पउर साल के प्रावधान मन ल सरलग रखे गए हे अऊ नवा प्रावधान घलोक करे गए हे। बजट मुख्य रूप ले गढ़बो नवा छत्तीसगढ़-स्वस्थ अऊ सुपोषित नवा युवा पीढ़ी के निर्माण के भावना के संग सुपोषण, स्वास्थ्य सुविधा मन के बेहतरी अऊ विस्तार अऊ युवा मन के ऊर्जा के सकारात्मक अऊ उत्पादक रूप म उपयोग करके उमन ल राज्य के सशक्त संसाधन के रूप म विकसित करे उपर केन्द्रित हे। बजट म कोनो नवा कर प्रावधान नइ करे गए हे।
1. माननीय अध्यक्ष महोदय, आज मैं सदन के आगू अपन सरकार के दूसर बजट के भाषण खाल्हे देहे लाइन के संग शुरू करत हंव:-
सर्वे भवन्तु सुखिनः, सर्वे सन्तु निरामयाः,
सर्वे भद्राणि पश्यन्तु, मा कश्चिद् दुःख भाग्भवेत्।।
2. आधुनिकता अऊ परम्परा के साम्य हमार विकास के बुनियादी दर्शन ये। ईही कारण हे के हमार विकास के मॉडल म कहूँ हम राज्य के नदी-नाला, धरती-जंगल अऊ तीज-तिहार मन ल सामिल करत हन त दुसर तरफ किसान मन के खाता मन ल अपडेट करे बर जियो-रिफरेंशिंग जइसे आधुनिक तकनीक के उपयोग करत हन।
3. हमार विकास के मॉडल समावेशी घलोक हे। विकास के योजना मन के लाभ समाज के सबले कमजोर मनखे मन तक पहुंचाना हमर प्राथमिकता हे। एकरे खातिर हम करजा ले दबे किसान मन अऊ गरीबी के कारण कुपोषित महिला मन अऊ लइका मन के विकास के योजना बनात हन।
4. चिन्ता के विसय हे कि राज्य बने के 19 बछर के बाद घलोक हमर महिला मन अऊ लइका मन के कुपोषण के स्थिति म अपेक्षित सुधार नइ होय हे। राज्य के सुदूर ग्रामीण अंचल मन ले लेके शहरी स्लम म रहइया परिवार ल हमन कुपोषण अऊ बीमारी मन ले रोजेच लड़त देखे हन। एकरे खातिर कुपोषण ल दूर करे अऊ स्वस्थ जीवनशैली के प्रति सबो ल जागरूक करे बर सुपोषण अभियान शुरू करे गए हे।
5. प्राथमिक बीमारी मन के जांच अऊ उपचार बर अब हमर स्वास्थ्य टीम के सदस्य साप्ताहिक हाट बाजार अऊ शहरी स्लम क्षेत्र मन म अपन आप पहुंच के मनखे मन के स्वास्थ्य परीक्षण करत हें अऊ जरूरत के मुताबिक परामर्श अऊ उपचार करे जात हे। जब जनता के दरद शासन अनुभव करे लागथे अऊ जनता के जरूरत म प्रशासन ओखर पास पहुंचे लागथे त समस्या मन के निदान आसान हो जाथे।
6. हमार मंशा केवल कुपोषण अऊ बीमारी मन ल कम करे तक सीमित नइ हे। हम तो एखर जड़ म जाके एखर मुख्य कारण गरीबी ल घलोक कम करना चाहत हन। एखर बर अब तक 17 लाख 24 हजार किसान मन के कृषि ऋण माफ करे जा चुके हे। ऋण माफी ले धान पंजीयन म किसान मन के संख्या बाढ़े हे। 2019-20 म अब तक 82 लाख 81 हजार मैट्रिक टन धान के रिकार्ड खरीदी हो गए हे।
7. ग्राम सुराजी योजना के अंतर्गत नरवा, गरूवा, घुरूवा अऊ बाड़ी विकास के काम मन म घलोक गांव वाले मन के बढ़-चढ़के सहयोग मिलत हे। नरवा संरक्षण के काम मन ले भू-जल के स्तर म सुधार होवत हे। गौठान मन म पशु मन ल चारा अऊ स्वास्थ्य परीक्षण के सुविधा मिलत हे। घुरूवा के प्रोत्साहन ले बायोगैस संयंत्र अऊ जैविक खाद निर्माण बर मनखे अपन आप आगू आवत हें। बारी मन ल फेर जिया देहे ले गांव वाले मन के आय अऊ पोषण म बढ़ोतरी होए हे।
8. राज्य म गन्ना के रस ले इथेनॉल बनाके ओला शासकीय पेट्रोलियम कम्पनी मन ल बेंचे बर हमन सार्थक कदम उठाए हन। अइसनहे धान ले इथेनॉल निर्माण बर केन्द्र शासन ले अनुमति प्राप्त करे बर सरलग उदीम करत हवन। ए योजना मन ले किसान मन ल धान अऊ गन्ना के जादा मूल्य मिलही, युवा मन ल रोजगार मिलही, उद्योग-व्यापार म बढ़ोतरी होही अऊ पेट्रोलियम आयात म राष्ट्र के विदेशी धन के घलोक बचत होही।
9. गरीबी म कमी लाय बर स्थानीय जरूरत के आधार म जिलेवार कार्ययोजना बनाए के काम शुरू करे गए हे। अति पिछड़ा जिला दंतेवाड़ा म गरीबी के प्रतिशत ल राष्ट्रीय गरीबी औसत 22 प्रतिशत के बराबर लाय के मुहिम शुरू हो गे हे। एखर बर जिला म उपलब्ध संसाधन मन के समुचित उपयोग करे के संगें-संग राज्य बजट ले घलोक रूपिया 20 करोड़ दे जाही।
10. हमार मानना हे कि शासन-प्रशासन के प्रयास अऊ जनता के सहभागिता ले गरीबी के स्तर म प्रभावी कमी आही। सुपोषण अऊ स्वास्थ्य के क्षेत्र म घलोक लउहेच हमर राज्य राष्ट्रीय स्तर के मानव विकास सूचकांक के समकक्ष होही।
आर्थिक स्थिति
11. अध्यक्ष महोदय, अब मैं राज्य के आर्थिक स्थिति के ब्यौरा सदन के आगू प्रस्तुत करत हंव। राज्य के पउर साल के आर्थिक सर्वेक्षण के मुताबिक स्थिर दर म साल 2018-19 म राज्य के सकल घरेलू उत्पाद म 6.08 प्रतिशत के बढ़ोतरी के अनुमान करे गए रहिस फेर अपडेट लउहे अनुमान के मुताबिक 7.06 प्रतिशत के बढ़ोतरी संभावित हे। मंदी के राष्ट्रीय आंकडा मन के बीच ये बढ़ोतरी राज्य बर एक सुखद संकेत हे।
12. वर्ष 2019-20 म स्थिर भाव म राज्य म कृषि क्षेत्र म 3.31 प्रतिशत, औद्योगिक क्षेत्र म 4.94 प्रतिशत अऊ सेवा क्षेत्र म 6.6 प्रतिशत के बढ़ोतरी अनुमानित हे। ए प्रकार कृषि अऊ औद्योगिक क्षेत्र मन म राज्य के अनुमानित बढ़ोतरी दर राष्ट्रीय स्तर म ए क्षेत्र मन म अनुमानित बढ़ोतरी दर क्रमशः 2.8 अऊ 2.5 प्रतिशत के तुलना म जादा हे।
13. प्रचलित भाव म राज्य के सकल घरेलू उत्पाद साल 2018-19 म 3 लाख 04 हजार करोड़ ले बाढ़के साल 2019-20 म 3 लाख 29 हजार करोड़ होना अनुमानित हे, जऊन पउर साल के तुलना म 8.26 प्रतिशत जादा हे।
14. पउर साल अनुमानित हरेक मनखे आय 96 हजार 887 के तुलना म साल 2019-20 म हरेक मनखे आय 98 हजार 281 रूपये के अनुमान हे, जऊन कि पउर साल के तुलना म 6.35 प्रतिशत जादा हे।
15. वर्ष 2019-20 के केन्द्रीय बजट म राज्य बर अनुमानित केन्द्रीय कर मन म कमी आए हे। अवइया साल म केन्द्र ले मिलइया जीएसटी क्षतिपूर्ति म घलोक कमी संभावित हे। एखर से राज्य के राजस्व उपर प्रतिकूल प्रभाव पड़ सकत हे फेर संतोष के विसय हे के राज्य सरकार के नीति अऊ उदीम मन ले राज्य के अपन के संसाधन 11 प्रतिशत के दर ले बाढ़त हे।
गढ़बो नवा छत्तीसगढ़: नवा पीढ़ी के निर्माण
16. अध्यक्ष महोदय, मोला ये बतात खुशी होवत हे कि ये बजट स्वस्थ अऊ सुपोषित नवा युवा पीढ़ी के निर्माण ल समर्पित हे। नवा युवा पीढ़ी उपर केन्द्रित ए बजट के कुछ बड़का प्रावधान मन के जानकारी देना चाहत हंव:-
16.1. राज्य के सबो परिवार ल सार्वभौम सार्वजनिक वितरण प्रणाली के अंतर्गत सम्मिलित करे जा चुके हे।
16.2. राज्य म 65 लाख 22 हजार राशन कार्डधारी हे अऊ लाभान्वित जनसंख्या 2 करोड़ 43 लाख हे। ए राशन कार्ड मन म चावल देहे बर 3 हजार 410 करोड़ के प्रावधान हे।
16.3. अनुसूचित जनजाति बाहुल्य इलाका मन म प्रति कुटुंब 2 किलो चना वितरण बर 171 करोड़ के प्रावधान हे। बस्तर संभाग म प्रति कुटुंब 2 किलो गुड़ वितरण बर 50 करोड़ के प्रावधान हे।
16.4. कोण्डागांव म आयरन अऊ विटामिन सहित फोर्टिफाईड चावल वितरण के पायलट परियोजना शुरू करे बर 5 करोड़ 80 लाख के नवा मद के प्रावधान हे।
16.5. 02 अकटूबर 2019 ले राज्य म मुख्यमंत्री सुपोषण अभियान शुरू करे गए हे। एखर तहत महिला मन अऊ लइका मन म कुपोषण अऊ एनीमिया के पहिचान अऊ निदान के काम करे जात हे। चिन्हित हितग्राही मन बर गरम भोजन अऊ अकतहा पोषण आहार के व्यवस्था करे जाथे। अबतक लगभग 4 लाख हितग्राही अभियान ले लाभान्वित हो गे हे।
16.6. मुख्यमंत्री सुपोषण अभियान के प्रति हितग्राही मन के रूचि अऊ सफलता ल देखत कुपोषण अऊ एनीमिया ल जड़ ले खतम करे बर मुख्यमंत्री सुपोषण योजना चालू करे जात हे। एखर बर 60 करोड़ के नवा मद के प्रावधान हे।
16.7. आंगनबाड़ी केन्द्र मन म लइका मन बर ऊंचाई, लंबाई अऊ भार मापक यंत्र के व्यवस्था करके पोषण के स्तर म सुधार के सरलग निगरानी करे जाही। एखर बर नवा मद म 25 करोड़ के प्रावधान हे।
16.8. विशेष पोषण आहार योजना म 766 करोड़, महतारी जतन योजना म 31 करोड़ के प्रावधान हे।
16.9. महात्मा गांधी के 150 वां जयंती के उपलक्ष्य म 2 अकटूबर 2019 के राज्य म स्वास्थ्य के दू बड़का योजना मन के संग कुल 5 स्वास्थ्य योजना मन के शुभारंभ करे गीस।
16.10. डॉ. खूबचंद बघेल स्वास्थ्य सहायता योजना म प्राथमिकता अऊ अंत्योदय राशन कार्डधारी परिवार मन ल 5 लाख रूपिया अऊ सामान्य राशन कार्ड वाले परिवार मन ल 50 हजार तक बिना पइसा के इलाज के सुविधा देहे जाही। योजना म करीबन 65 लाख परिवार मन ल इलाज के पात्रता होही। एखर बर 550 करोड़ के प्रावधान हे।
16.11. मुख्यमंत्री विशेष स्वास्थ्य सहायता योजना के तहत गंभीर बीमारी मन के उपचार म 20 लाख तक के खरचा बर 50 करोड़ के प्रावधान हे।
16.12. मुख्यमंत्री हाट बाजार क्लिनिक योजना म दूरस्थ ग्रामीण क्षेत्र मन के हाट बाजार म अवइया मनखे मन ल स्वास्थ्य परीक्षण अऊ उपचार के सुविधा देहे बर 13 करोड़ के प्रावधान हे। 5 महिना के कमती समय म ही 11 लाख ले घलोक जादा मरीज मन ल लाभ प्राप्त हो चुके हे।
16.13. मुख्यमंत्री शहरी स्लम स्वास्थ्य योजना के अंतर्गत 13 नगर निगम मन के स्लम एरिया म निवासरत परिवार मन ल निःशुल्क स्वास्थ्य परामर्श, जांच उपचार अऊ दवाई उपलब्ध कराए के व्यवस्था हे। योजना के अंतर्गत अब तक 3 हजार 500 ले घलोक जादा स्वास्थ्य शिविर आयोजित करे गे लगभग 17 लाख मनखे मन के इलाज करे जा चुके हे।
16.14. हमर सरकार कोति ले मलेरिया मुक्त बस्तर अभियान चलाय जात हे। अभियान के तहत घर-घर जाके अब तक 13 लाख 92 हजार मनखे मन के खून सैंपल के जांच करे गए हे। जमा ये बात बताना जरूरी हे के ये मां लक्षण रहित मलेरिया प्रभावित मनखे के घलोक पहिचान करके उपचार करे जात हे।
16.15. मलेरिया संक्रमण ले खून के कमी हो जाथे जेखर से एनीमिया के स्थिति निर्मित होथे। जेखर सेती मलेरिया मुक्त बस्तर अभियान मलेरिया ले मुक्ति के संगें-संग एनीमिया, कुपोषण, शिशु अऊ मातृ-मृत्यु दर म कमी लाय म घलोक कारगर सिद्ध होही।
16.16. राज्य सिकलसेल संस्थान म उच्च स्तरीय प्रयोगशाला अऊ सबो जिला अस्पताल मन म सिकलसेल यूनिट के स्थापना करे जाही। एखर से चिरायु योजना अंतर्गत स्कूल मन ल चिन्हित करे गए सिकलसेल ले पीड़ित लइका मन अऊ सिकलसेल के आन मरीज मन ल उच्च स्तरीय जांच, उपचार अऊ परामर्श के निःशुल्क सुविधा मिल सकही।
16.17. एम.सी.आई. के मापदण्ड के जइसे चिकित्सा महाविद्यालय मन म चिकित्सा उपकरण अऊ स्किल लैब के स्थापना बर नवा मद म 75 करोड़ के प्रावधान हे।
16.18. युवा मन के प्रेरणा स्त्रोत स्वामी विवेकानंद जी के रायपुर स्थित निवास स्थान डे-भवन ल मालिक विवेकानंद स्मृति संस्थान के रूप म विकसित करे जाही।
16.19. राज्य के विकास म युवा मन के भागीदारी बढ़ाए बर राजीव युवा मितान क्लब योजना शुरू करे जाही। योजना म 15 हजार युवा मितान क्लब गठित करे के लक्ष्य हे। एखर बर नवा मद म 50 करोड़ के प्रावधान हे।
16.20. युवा मन म अर्न्तनिहित बहुआयामी प्रतिभा ल अवसर प्रदान करे बर ए साल बहुस्तरीय युवा महोत्सव के आयोजन करे गीस। आयोजन म पहली पइत छत्तीसगढ़ के पारम्परिक लोक गीत, नृत्य, खेल अऊ छत्तीसगढ़ी व्यंजन मन ल सामिल करे गीस। आयोजन के सफलता ल देखत हर बछर युवा महोत्सव आयोजित करे के निर्णय लेहे गए हे। एखर बर नवा मद म 5 करोड़ के प्रावधान हे।
16.21. आईआईटी, आईआईएम अऊ एम्स जइसे राष्ट्रीय स्तर के शैक्षणिक संस्थान मन म प्रवेश लेवइया राज्य के युवा मन के शिक्षण शुल्क के भार शासन कोति ले वहन करे जाही। अइसन युवा मन के प्रतिभा के राज्य के विकास म उपयोग करे बर शासकीय, अर्द्धशासकीय संस्थान मन म सीधा चयन के पात्रता देहे जाही।
16.22. खेल संबंधी नीतिगत निर्णय, कई ठन विभाग मन ले समन्वय, खेल अधोसंरचना मन के रख-रखाव अऊ आवासीय खेल अकादमी के संचालन बर छत्तीसगढ़ खेल विकास प्राधिकरण के गठन करे गए हे।
16.23. मुख्यमंत्री खिलाड़ी प्रोत्साहन योजना के तहत प्रतिभावान खिलाड़ी मन ल उच्च स्तर के प्रशिक्षण, खेल-सामग्री अऊ राष्ट्रीय अऊ अंतर्राष्ट्रीय खेल प्रतियोगिता मन म भाग लेने बर आर्थिक सहायता उपलब्ध कराए जाही। एखर बर नवा मद म 10 करोड़ के प्रावधान हे।
कृषि, पशुपालन अऊ मत्स्य पालन
17. धान उत्पादन म प्रोत्साहन अऊ कृषि ऋण मन के माफी ले राज्य के ग्रामीण अर्थव्यवस्था मजबूत होए हे। नरवा, गरूवा, घुरवा, बाड़ी ल जन अभियान के रूप म बदले के निर्णय गांव वाले मन बर वरदान सिद्ध होवत हे। हमर ए दूरदर्शी योजना मन के परिणाम हे कि जब पूरा देश मंदी के दौर ले गुजरत हे, तब छत्तीसगढ़ म ऑटोमोबाईल सेक्टर म बिक्री म ग्रोथ दर्ज होवत हे।
18. केन्द्र सरकार कोति ले पिछला सरकार ल बोनस वितरण के संग समर्थन मूल्य म धान खरीदी के विशेष छूट दे गए रहिस फेर ए साल केन्द्र ह राज्य ल ये छूट प्राप्त नइ दीस। अन्नदाता ल ऊंखर श्रम के उचित लाभ देहे बर राजीव गांधी किसान न्याय योजना चालू करे जाही। योजना के लाभ साल 2019-20 बर घलोक दे जाही। एखर बर 5 हजार 100 करोड़ के प्रावधान हे।
19. प्रधानमंत्री फसल बीमा योजना म 366 करोड़, राष्ट्रीय कृषि विकास योजना म 370 करोड़, एकीकृत बागवानी मिशन म 205 करोड़, जैविक खेती मिशन बर 20 करोड़, वाटरशेड प्रबंधन कार्यक्रम म 200 करोड़ अऊ प्रधानमंत्री कृषि सिंचाई योजना म 110 करोड़ के प्रावधान हे।
20. कृषक जीवन ज्योति योजना के तहत 5 एच.पी. तक के कृषि पंप मन बर निःशुल्क विद्युत प्रदाय के प्रावधान हे। अभी हाल म योजना म 5 लाख 26 हजार कृषक मन ल 2 हजार 164 करोड़ के छूट प्राप्त होवत हे। एखर बर 2 हजार 300 करोड़ के प्रावधान हे।
21. गोठान मन के संचालन बर गौठान समिति मन ल हरेक महीना 10 हजार के अनुदान अऊ पशु मन के चारा बर धान के पैरा के व्यवस्था करे जाही। पैरा के रख-रखाव ल सरल बनाए बर चौकोर बेलर क्रय करे बर नवा मद म 6 करोड़ के प्रावधान हे।
22. बेमेतरा, जशपुर, धमतरी अऊ अर्जुन्दा, जिला बालोद म उद्यानिकी महाविद्यालय अऊ लोरमी म कृषि महाविद्यालय के स्थापना बर नवा मद म 5 करोड़ के प्रावधान हे।
23. इंदिरा गांधी कृषि विश्वविद्यालय, रायपुर म खाद्य प्रौद्योगिकी संस्थान के स्थापना करे जाही। एखर चालू होए ले कृषि अऊ सम्बद्ध उत्पाद म न के प्रसंस्करण, मूल्य संवर्धन अऊ पोस्ट हार्वेस्ट हानि ल कम करे म कुशल मानव संसाधन मन के सृजन होही।
24. बेमेतरा अऊ तखतपुर म डेयरी डिप्लोमा महाविद्यालय के स्थापना करे जाही। एखर बर 2 करोड़ के प्रावधान हे।
25. मछली पालन के क्षेत्र म रोजगार के संभावना ल देखत युवा मन ल डिप्लोमा पाठ्यक्रम के अध्यापन बर ग्राम राजपुर (धमधा) म फिशरीज पॉलिटेक्निक के स्थापना कर जाही।
26. 9 पशु औषधालय मन ल पशु चिकित्सालय म उन्नयन, 12 नवीन पशु औषधालय अऊ 5 विकास खंड मन म मोबाईल पशु चिकित्सा इकाई स्थापित करे जाही।
