मुख्यमंत्री श्री भूपेश बघेल ह दीस बधाई
राज्य के दू खिलाड़ी इंडिया कैम्प बर चुने गीस
रायपुर दिनाकं 08 मार्च 2020। मुख्यमंत्री श्री भूपेश बघेल ह छत्तीसगढ़ राज्य के महिला फुटबॉल टीम ल राष्ट्रीय विजेता बनने म बधाई देहे हें। मध्य गोवा म आयोजित नेशनल इनक्लुसन (डायवरसिटी) फुटबॉल कप प्रतियोगिता म छत्तीसगढ़ राज्य के महिला टीम ह फाइनल म पंजाब ल हराके राष्ट्रीय विजेता के खिताब हासिल करे हे। प्रतियोगिता म उत्कृष्ट प्रदर्शन के आधार म दू खिलाड़ी वंदना ध्रुव अउ निलिमा खाखा के चयन इंडिया कैम्प म होय हे।
खेल संचालक श्रीमती श्वेता श्रीवास्तव सिन्हा ह विजेता खिलाड़ी मन ल जीत के बधाई देहे हें। ए खिताब बर सबो खिलाड़ी अउ वरिष्ठ प्रशिक्षक मन ह खेल अउ युवा कल्याण विभाग के आभार जताए हें।
प्रतियोगिता म उत्कृष्ट प्रदर्शन के आधार म चुने गे वंदना ध्रुव अउ निलिमा खाखा फिनलैण्ड़ म आयोजित होवइया वर्ल्ड कप म भारत के प्रतिनिधित्व कर सकहीं। विजेता टीम म वंदना ध्रुव, निलिमा खाखा, चादंनी श्रीवास, प्रीति फुटान, भुमिका साहू, मेनका सचदेव, कंचन यादव, नेहा वंशी, देवंतीन निषाद अउ दुर्गा ह अपन उत्कृष्ट खेल के प्रदर्शन करत छत्तीसगढ़ ल गौरवान्वित करे हें। हम आपला बता देवन कि खेल अउ युवा कल्याण विभाग के वरिष्ठ प्रशिक्षक, सरिता कुजूर टोप्पो ह रोजे 60 बालिका खिलाड़ी मन ल नियमित प्रशिक्षण देवत हे। विभाग कोति ले ये सुविधा खिलाड़ी मन ल निःशुल्क प्रदान करे जात हे। एखर अकतहा कोटा स्टेडियम म एथलेटिक के खिलाड़ी घलोक नियमित अभ्यास करत हें।
