- राज्य सरकार पूरा तरीका ले मुस्तैद: जनता ले सहयोग के अपेक्षा
- कोरोना के उपचार म लगे स्वास्थ्य विभाग के अमला ल मिलही विशेष भत्ता
- बचाव अऊ उपचार के सही जानकारी देहे बर एक इमरजेंसी कम्यूनिकेशन टीम गठित
रायपुर, 19 मार्च 2020। मुख्यमंत्री श्री भूपेश बघेल ह कोरोना वायरस ले बचाव के संबंध म आज प्रदेश के जनता ल संबोधित करिन। उमन अपन संबोधन म कहिन –
‘मयारू भाई मन अऊ बहिनी मन, जय जोहार, जइसे के आप मन जानतेच हब के पूरा विश्व ये बेरा म कोरोना वायरस के महामारी ले जूझत हे। छत्तीसगढ़ म घलोक आज कोरोना वायरस के एक केस पाजीटिव पाए गए हे। जेखर समुचित उपचार एम्स रायपुर म चलत हे। पीड़ित के परिवार के सबो सदस्य अऊ ऊंखर सम्पर्क म अवइया सबो मनखे मन के पहिचान करके उमन ल घलोक आइसोलेशन म रखे गए हे।
राज्य म कोरोनो वायरस ले उपचार के माकूल व्यवस्था हे अऊ एखर से डरे या चिंता करे के कोनो जरूरत नइ हे, तभो ले अब हमला जादा सतर्क रहना होही अऊ लापरवाही ले बचना होही। एम्स म योग्य चिकित्सक, पीड़ित के उपचार करत हें। देश म अभी तक बहुत अकन कोरोना पीड़ित स्वस्थ हो गए हें। राज्य म विदेश यात्रा करके लहुटे सबो नागरिक मन के स्वास्थ्य परीक्षण करके ओ मन ल आइसोलेशन म रखे के प्रक्रिया जारी हे। मैं फेर अपन बात दुहरावत हंव के आप मन के जानकारी म कहूं अइसन कोनो मनखे हे जऊन विदेश यात्रा ले लहुटे हे अऊ ओ ह स्वास्थ्य विभाग ल रिपोट नइ करे हे त एखर सूचना तुरंते टोल फ्री नम्बर 104 म देवव।
मनखे मन ल ये समझना होही के जानकारी लुकाय ले कोरोना वायरस ले बचाव नइ हो सकय भलुक जानकारी देहे अऊ सही उपचार लेहे ले ही बचाव संभव हे। लइका मन अऊ सियान मन ल विशेष सावधानी रखे के जरूरत हे।
मोर राज्य के नागरिक मन ले आग्रह हे के बहुतेच जरूरी होए म ही अपन घर ले बाहिर निकलव। मनखे मन के सावधानी अऊ सुरक्षा बर मैं ह खुद अपन सबो कार्यक्रम अऊ समारोह रदद् कर देहे हंव। राज्य म स्कूल, कालेज, सिनेमा हॉल, मॉल अऊ भीड़भाड़ वाले जगा मन म मनखे मन के सकलाए म रोक लगा दिए गए हे।
मैं घेरी बेरी आप मन ल ये आश्वासन देवत हंव के आप मन ल चिंता करे के कोनो जरूरत नइ हे। मैं आप मन के मुख्यमंत्री, राज्य सरकार अऊ ओखर पूरा महकमा पूरा मुस्तैद हे अऊ हमन ये वायरस ले बचाव अऊ उपचार के पूरा तैयारी कर रखे हन, जरूरत हे त बस आप मन के सहयोग के।
हमन राज्य म कोरोना वायरस ले बचाव अऊ उपचार के सही जानकारी देहे बर एक इमरजेंसी कम्यूनिकेशन टीम ECT बनाए हन जऊन आप मन ल सरलग सही सूचना देहे के काम करही अऊ भ्रामक खबर मन के प्रचार ल रोकही।
मैं कोरोना उपचार बर लगातार काम करत स्वास्थ्य विभाग के सबो चिकित्सक अऊ चिकित्सीय स्टॉफ के तहेदिल ले आभारी हंव। पूरा राज्य ऊंखर समर्पण भाव के सराहना करत हे। मैं ह ये निर्णय लेहे हंव के कोरोना के उपचार म लगे स्वास्थ्य विभाग के अमला ल विशेष भत्ता अकतहा देहे जाही।
राज्य सरकार ह एक महत्वपूर्ण निर्णय लेत राजधानी रायपुर संग सबो नगर निगम क्षेत्र मन म धारा 144 लगा देहे हे। एकर मुख्य उद्देश्य मनखे मन ल एक जगा म जादा संख्या म सकलाए ले रोकना हे जेखर से कोरोना वायरस के प्रसार ल रोके जा सकय।
मोला पूरा विश्वास हे के छत्तीसगढ़ के जनता ये संकट के घड़ी म राज्य सरकार के अऊ एक दूसर के घलोक सहयोग करही ताकि हम ये कोराना वायरस के फैलाव ल रोक सकन। आप मन के सहयोग के अपेक्षा हे।’
