कोरोना वायरस संकट के बेरा म छत्तीसगढ़ सरकार के राहत वाला फैसला

कोरोना वायरस संक्रमण रोके के उपाय के बेरा म आम जनता ल कोनो परेसानी नइ होवय

रायपुर, 24 मार्च 2020। राज्य शासन कोति ले कोरोना वाइरस के फैलाव रोके बर युद्धस्तर म करे जात उदीम के संग आम जनता के सहोलियत के घलोक पूरा सम्वेदनशीलता ले ध्यान रखे गए हे। मुख्यमंत्री श्री भूपेश बघेल के पहल म आम जनता बर बहुत अकन कल्याणकारी फैसला लागू करे गए हे। ए फैसला मन ले गरीब, स्कूली लइका, आम नागरिक अऊ व्यापारी मन संग सबो मनखे मन ल 31 मार्च तक लॉक डाउन के बेरा म बड़का राहत मिलही।

छत्तीसगढ़ सरकार कोति ले ये कल्याणकारी कदम उठाए गए हे-
1- राज्य सरकार ह सार्वजनिक वितरण प्रणाली के राशनकार्ड धारक मन ल अप्रेल अउ मई महिना 2020 के चावल के एकमुश्त वितरण करे के निर्णय लेहे हे। एखर बर खाद्य विभाग कोति ले आबंटन जारी करत अंत्योदय, प्राथमिकता अऊ अन्नपूर्णा श्रेणी के राशनकार्ड धारक मन ल अप्रेल महिना अउ मई महिना के चांवल के संग नमक अऊ शक्कर के घलोक एकमुश्त वितरण इही महिना म करे के हुकुम जारी करे गए हे।

2- मुख्यमंत्री श्री भूपेश बघेल के हुकुम म छुट्टी के बेरा म स्कूली लइका मन ल मध्यान्ह भोजन देहे के निर्णय लेहे गए हे। ये योजना म मध्यान्ह भोजन बर 40 दिन के सूखा दाल अऊ चावल लइका मन के पालक मन ल स्कूल ले देहे जाही। प्राथमिक शाला के हरेक लइका ल 4 किलोग्राम चावल अऊ 800 ग्राम दाल अऊ उच्चतर माध्यमिक शाला के हरेक लइका ल 6 किलोग्राम चावल अऊ 1200 ग्राम दाल देहे जाही।

3-आंगनबाड़ी केन्द्र के लइका मन बर टेक होम राशन वितरण के हुकुम देहे गए हे। प्रदेश के सबो आंगनबाड़ी अऊ मिनी आंगनबाड़ी केन्द्र मन ल 31 मार्च 2020 तक बंद करे गए हे। राज्य सरकार ह ये बेरा म 03 ले 06 साल उमर के समान्य, मध्यम अऊ गंभीर कुपोषित लइका मन ल गरम भोजन के जगा म वैकल्पिक व्यवस्था के रूप म 125 ग्राम रेडी टू ईट रोजेच के मान ले 750 ग्राम टेक होम राशन (रेडी टू ईट) के अनिवार्य रूप ले वितरण के हुकुम देहे गए हे । बांचे हितग्राही मन ल घलोक पात्रता के मुताबिक रेडी-टू-ईट के वितरण यथावत जारी रइही।

4- प्रदेश के सबो नगरीय निकाय मन म अनुज्ञा, परमिट, लायसेंस आदि नवीनीकरण कराए के समय-सीमा म घलव एक महिना के बढ़ोतरी करे गए हे।

5- राजस्व न्यायालय मन म प्रकरण मन के पेशी एक अप्रेल या ओखर बाद रखे के हुकुम देहे गए हे।

6- वाणिज्यिक कर (पंजीयन) विभाग ह छत्तीसगढ़ बाजार मूल्य के पुनरीक्षित दर जऊन एक अप्रेल ले लागू होथे, ओला एक महिना बढ़ाके अब एक मई कर देहे गए हे। पंजीयन कार्यालय मन म मार्च के महिना म होवइया भीड़ के समस्या ल ध्यान म रखत ये वाले निर्णय लेहे गए हे।

7-प्रदेश के नगरीय निकाय मन म सम्पत्ति कर जमा करे के आखरी तारीक 31 मार्च ल बढ़ाके अब 30 अप्रेल तक कर दे गए हे।

8- कोरोना वायरस (कोविड-19) के रोकथाम के उपाय मन के तहत छत्तीसगढ़ सरकार ह अल्कोहल आधारित हैण्ड सैनिटाईजर (हैण्ड रब सॉल्यूशन) के औद्योगिक निर्माण बर दो डिस्टिलरी ल लाइसेंस देहे हे।

9- कोरोना के उपचार म लगे स्वास्थ्य विभाग के अमला ल विशेष भत्ता देहे के फैसला लेहे हे।

10- राज्य के सबो निजी संस्थान, कारखाना, अस्पताल, मॉल, रेस्टोरेंट मन के नियोजक मन ले मानवीय संवेदना ल ध्यान म रखत श्रमिक अउ कर्मचारी मन के छंटनी नइ करे अऊ कोरोना वायरस (कोविड-19) ले पीडि़त होए या आन कारन ले बीमार होए म संवैतनिक अवकाश प्रदान करे के संगेच जरूरत परे म उंखर से घर ले घलोक काम लेहे के हुकुम दिये हे।

11- निम्नदाब उपभोक्ता मन के मीटर रीडिंग -बिलिंग म 31 मार्च तक रोक, ‘हाफ रेट म बिजली योजना’ के तहत् मिलही एक मुश्त दू महिना के लाभ।