असहाय मनखे मन के आगू रोजी रोटी के उपजे संकट के निवारण बर कई समाज, संगठन, व्यापारी करत हे सहयोग, कहूं अइसन मनखे मन के आप घलोक करना चाहत हव मदद, त ये नंबर म करव संपर्क
दुर्ग, 28 मार्च 2020। वैश्विक महामारी कोरोना वायरस के संक्रमण रोके बर केंद्र सरकार कोति ले घोषित दिनांक 24 मार्च के रात 12.00 बजे ले 21 दिन के लाक डाउन के सेती कई गरीब असहाय मनखे मन के आगू रोजी रोटी के उपजे संकट ले निवारण बर जिहां कई ठन संस्था, समाज अउ समुदाय आगू आवत हे उहें भिलाई के कुछ संगठन ह घलोक संवेदनशीलता देखात अपन सामाजिक उत्तरदायित्व के निर्वहन करत जरूरतमंद मनखे मन बर राशन अउ आन जरूरी सामान भिलाई निगम ल प्रदाय करे हे।
श्री राम सिंधी पंचायत नगर भिलाई के लक्ष्मण अल्याणी, भीमसेन, शीशपाल, अजय भसीन ह 75000 रुपए के सामान जइसे चावल, मसाला, नमक, तेल, दाल, आटा अउ मॉस्क आदि देहे हे। लिंक रोड के थोक अउ फुटकर व्यवसायी उदय सिंह, जिनेश जैन, अनिल अग्रवाल, प्रमोद अग्रवाल ह घलोक अइसनहे राशन सामान निगम के कार्यालय म स्टोर करवाए हे ताकि असहाय जरूरतमंद मन तक सामान पहुंचाए जा सकय। अइसनहे अजीत सिंह इंटरप्राइजेज ह 51000 रूपिया के किराना सामान देहे के सहमति प्रदान करे हें।
निगम कोति ले अइसन इच्छुक संगठन, समाजसेवी, व्यापारी मन जऊन ये प्रकार के सहायता करना चाहत हें वो मन चंद्रपाल हरमुख मोबाइल नंबर 9109176812 म संपर्क कर सकत हें। श्री राम सिंधी पंचायत के संचालक ह बताइस के जइसे अभी देश म कोरोना वायरस जइसे संक्रमण के संकट मंडरावत हे अइसन म देश के हरेक नागरिक मन ल आगू आके मदद करे के जरूरत हे, जेखर से काकरो मौत भूख ले झन होवय। संगेच उमन शहरवासी मन ले सावधानी अऊ सतर्कता बरते के अपील करे हे अऊ मनखे मन म जागरूकता फैलाय के घलोक संदेश देहे हें। निगम के जय जैन अउ विनोद चंद्राकर सकलाए जिनिस मन ल स्टोर करके रखे के काम करत हें।
