रायपुर, 31 मार्च 2020। पूरा देश कोरोना वायरस (कोविड-19) संक्रमण ले लड़त हे। वायरस ले बचाव बर प्रदेश म सबो आंगनबाड़ी केन्द्र घलोक अस्थायी रूप ले बंद हे। अइसन स्थिति म राज्य सरकार लइका अऊ महिला मन के स्वास्थ्य अऊ पोषण के पूरा ध्यान रखत हे। दूरिहा के नक्सल प्रभावित अबूझमाड़ क्षेत्र के नारायणपुर जिला म घलोक 19 महिला स्वसहायता समूह अऊ आगंनबाड़़ी कार्यकर्ता, आंगनबाड़ी केन्द्र के लइका मन, गर्भवती-शिशुवती महिला मन ल ऊंखर घर-घर जाके हेल्दी रेडी-टू-ईट फूड के सफलता के संग वितरण करत हें। संगेच वो कोरोना वायरस ले बचाव के प्रति लइका अऊ महिला मन के संग गांव वाले मन ल घलोक जागरूक करे म पूरा सहयोग करत हें। लइका मन ल साफ-सफाई, हाथ धोए अउ सोशल डिस्टेंसिंग (सामाजिक दूरी) रखे के बारे म बतावत हें।
जिला के 556 आंगनबाड़ी केन्द्र म दर्ज लइका मन, गर्भवती अऊ शिशुवती समेत कुल 17 हजार 918 हितग्राही मन ल हेल्दी रेडी-टू-ईट फूड घर-घर जाके देहे जात हे। एखर ले पहिली सबो मनखे मन ल एक-एक हफ्ता के फूड घलोक देहे गए हे। जिला महिला बाल विकास अधिकारी श्री रविकांत धु्रर्वे ह बताइस के अप्रेल महिना म घलोक सबो 17 हजार 918 महिला मन अऊ लइका मन ल एक-एक महिना के हेल्दी रेडी-टू-फूड के वितरण करे जाही। उमन बताइन के जिला म 6 महिना ले 36 महिना के सामान्य लइका मन के संख्या 6 हजार 287, छः महिना ले 36 महिना के गंभीर कुपोषित लइका मन के संख्या 1 हजार 731 अऊ 3 साल ले 6 साल के सामान्य लइका मन के संख्या 5 हजार 959 अऊ इही आयु वर्ग के गंभीर कुपोषित लइका मन के संख्या एक हजार 46 हे। ए सबो ल पौष्टिक रेडी-टू-ईट उपलब्ध कराए जात हे। एखर संगेच एक हजार 513 गर्भवती महिला मन अऊ एक हजार 382 शिशुवती महिला मन ल घलोक हेल्दी रेडी-टू-फूड एक-एक महिना के देहे जाही। लइका मन म प्रतिरोधक क्षमता बनाए रखे बर कार्यकर्ता अऊ सहायिका मन कोति ले गंभीर कुपोषित लइका मन के खान-पान म विशेष ध्यान रखे जात हे।
