रायपुर, 5 अप्रैल 2020। छत्तीसगढ़ के स्वास्थ्य मंत्री टी.एस. सिंह देव के बताती कोरोना वायरस के 3 अऊ मरीज़ एकदमेच ठीक हो गे हे, अब तक कुल 10 मरीज़ मन म ले 7 मरीज़ ठीक हो गे हे। एम्स ले डिस्चार्ज तीन मरीज मन म देवेन्द्र नगर निवासी युवक, बैरन बाजार निवासी युवती अऊ डीडी नगर निवासी युवती हें। एखर पहिली चार मरीज ठीक होए हें।
हमारे यहां छत्तीसगढ़ में तीन और COVID19 मरीज़ ठीक हो गए हैं और पूरी तरह से स्वस्थ हैं। 10 में से 7 बिल्कुल ठीक हो चुके हैं। हमारा मेडिकल स्टाफ हर मरीज़ की देखभाल के लिए 24 घंटे काम कर रहा है।
आईए हम सभी सतर्कता बनाए रखें और मुझे यकीन है कि हम इस आपदा से विजय हो कर बाहर आएंगे।
— TS Singh Deo (@TS_SinghDeo) April 5, 2020
एम्स के अधीक्षक करण पिपरे के बताती इतवार के तीन कोरोना पाजीटिव मरीज ल ठीक होए के बाद डिस्चार्ज करे गए हे। सरलग निगरानी अऊ इलाज ले ये संभव होए हे। उंकर कहना हे के प्रदेश म अब सिरिफ तीन करोना पॉजिटिव मरीज बांच गे हे, जिंकर इलाज चलत हे अउ वो मन घलोक लउहे ठीक हो जाहीं। जिंकर अभी अस्पताल म इलाज चलत हे वो मन म राजनांदगाँव के युवक, जऊन थाईलैंड ले लहुटे हे अउ कोरबा के युवक जऊन लंदन ले लहुटे हे अउ कटघोरा के युवक जऊन तबलीकी जमात ले लहुटे हे।
आप मन जानतेच हव के अब तक छत्तीसगढ़ म कुल 10 कोरोना पॉजिटिव मरीज आगू आए रहिन। जेमा ले 7 मरीज के ठीक होए के बाद डिस्चार्ज कर दे गए हे। डिस्चार्ज होए के बाद घलव ये सबो मन फिलहाल 28 दिन बर होम आइसोलेशन म रइहीं।
छत्तीसगढ़ म कहां-कहां ले मिले रहिस कोरोना पॉजीटिव मरीज-
1. 19 मार्च- रायपुर के समता कॉलोनी निवासी 23 वर्षीय युवती कोरोना पॉजिटिव मिले रहिस वो ह 16 मार्च के लंदन ले छत्तीसगढ़ लहुटे रहिस। येला एम्स अस्पताल म आइसोलेशन म रखे गए हे, अभी एकर इलाज चलत हे।
2. 25 मार्च- राजनांदगांव के भरकापारा निवासी युवक थाईलैंड ले घूमके घर लहुटे सहिस। जेकर कोरोना जांच सैंपल पॉजिटिव मिले रहिस। एकर उमर 30 साल के अंदर हे, एला एम्स म क्वारंटाइन म रखे गए हे, अभी एकर इलाज चलत हे।
3. 25 मार्च- सुभाष स्टेडियम इलाका, रायपुर के रहइया युवती उमर 30 साल के अंदर हे ते ह कोरोना पॉजिटिव रहिस। वो ह लंदन ले 16 मार्च के रायपुर आए रहिस। एखर खिलाफ विदेश ले लहुटे के जानकारी लुकाए, सरकार के हुकुम के अवहेलना अऊ दूसर मन के जान मुसीबत म डाले बर कोतवाली थाना म एफआईआर घलोक दर्ज करे गए हे।
4. 25 मार्च- बिलासपुर के रामा लाइफ म एक 64 वर्षीय महिला के सैंपल पॉजिटिव आए हे। ये महिला 10 फरवरी के दुबई ले बिलासपुर आए रहिस। विदेश ले लहुटे के जानकारी ए ह लुकाए रहिस।
5. 25 मार्च- दुर्ग-भिलाई जोन सेक्टर 2 के खुर्सीपार के रहइया युवक 10 मार्च के दुबई ले लहुटे रहिस। जांच रिपोट म कोरोना पॉजिटिव होए के पुस्टि होए हे।
6. 25 मार्च- रायपुर के बड़े रामनगर के करीबन 60 साल उमर के मनखे जेकर आन राज्य अऊ विदेश यात्रा के कोनो हिस्ट्री नइ हे। माने जात हे के एला समाज म फइले कोरोना संक्रमण आए हे।
7. 28 मार्च- रायपुर के देवेंद्र नगर इलाका के रहइया युवक जउन ब्रिटेन ले लहुटे रहिस तेन कोरोना पॉजिटिव पाए गए रहिस। वो हाले म रायपुर आए रहिस, एम्स म ओखर इलाज चलत हे।
8. 30 मार्च- कोरबा निवासी युवक घलव ब्रिटेन के यात्रा करके लहुटे रहिस, वोकरो जांच रिपोट पॉजिटिव आइस।
9. 31 मार्च- रायपुर के कंचन गंगा, डीडी नगर निवासी युवती कोरोना पॉजिटिव पाय गए रहिस। वो ह लंदन के यात्रा करके लहुटे रहिस।
10. 4 अप्रैल- कटघोरा निवासी 16 वर्षीय लइका कोरोना पॉजिटिव पाए गीस। ये लइका तबलीगी जमात म सामिल होके आए रहिस। अभी एकर इलाज चलत हे।
