- लॉकडाउन म घलोक प्रशासन के कुपोषण ले जंग जारी
- सुपोषण अभियान के अंतर्गत 54 पंचायत के 33 हजार 700 हितग्राही मन के घर तक पहुँचिस राशन
कोण्डागांव, 07 अप्रैल 2020। कोरोना वायरस ले फइले बीमारी के सेती होए देशव्यापी तालाबंदी ले छत्तीसगढ़ शासन के कई ठन योजना प्रभावित होवत हे। अइसनहे ये तालाबंदी ले राज्य शासन के महत्वाकांक्षी योजना मुख्यमंत्री सुपोषण अभियान जेखर लक्ष्य राज्य के हरेक मनखे ल सुपोशित करना हे, तेकरो प्रभावित होए के आशंका बने रहिस, जऊन ल गंभीरता ले लेत राज्य शासन ह ये आपदा के स्थिति म घलोक ये योजना ल सरलग चालू रखे बर हितग्राही मन ल सूखा राशन घर तक पहुंचाए के निर्णय लीस। एखर अंतर्गत कोण्डागांव जिला म कलेक्टर नीलकण्ठ टीकाम के हुकुम म सूखा राशन बांटे के काम युद्ध स्तर म करे जात हे। ये योजना म जिला म पहिली चरण म 36 पंचायत म 26175 हितग्राही मन ल अऊ दूसर चरण म 18 पंचायत के 7525 हितग्राही मन ल लक्षित करे गए रहिस। एकर जइसे कुल 54 पंचायत के 33750 हितग्राही मन ल लक्षित करके उंकर तक सूखा राशन पहुंचाए के जिम्मा आंगनबाड़ी कार्यकर्ता मन ह अपन खांधा म उठाए हे।
सूखा राशन म 06 महिना ले 3 बछर तक के कुपोषित लइका मन ल अउ 15 ले 49 बछर के एनिमिक महिला मन बर चांवल, दाल, आलू, प्याज, सोयाबीन, मटर या चना, नमक तेल अउ मसाला देहे जात हे। एखरे संगेच गर्भवती, शिशुवती माता अउ लइका मन के स्वास्थ्य के घलोक ध्यान आंगनबाड़ी कार्यकर्ता मन गृह भेंट के माध्यम ले रखत हें अउ तय समय म लगइया टीकाकरण घलोक ए.एन.एम. अउ मितानिन मन के सहयोग ले लगाए जात हे। ये विषम हालत म घरे म रेडी टू ईट पोषण आहार के पैकेट मिले ले लइका मन के अभिभावक मन ह खुशी जाहिर करे हें।
