अंबिकापुर, 15 अप्रैल 2020। कोरोना संक्रमण के सेती देशव्यापी लॉकडाउन के चलते मुख्यमंत्री श्री भूपेश बघेल के विशेष पहल अऊ हुकुम म छत्तीसगढ़ राज्य म दूसर राज्य के प्रवासी श्रमिक अऊ जरूरतमंद मन के मदद बर जगा-जगा म राहत शिविर लगाए गे हे। ए राहत शिविर म देश के कई प्रांत के श्रमिक सपरिवार रूके हें। श्रमिक मन के संग ऊंखर लइका घलोक ए शिविर मन म रहत हें। श्री बघेल ह दूसर राज्य मन ले छत्तीसगढ़ आए प्रवासी श्रमिक मन ल छत्तीसगढ़ के मेहमान कहे हें अऊ ऊंखर रहे, खाए अऊ चिकित्सा के व्यवस्था के हुकुम प्रशासन ल देहे हें। प्रवासी श्रमिक मन के संगें-संग ऊंखर लइका मन के सुविधा के घलोक राहत शिविर म ध्यान रखे जात हे। खाली समय म लइका मन बर ए राहत कैम्प मन म खेल-कूद अऊ आन रचनात्मक गतिविधि के संगेच उंखर शिक्षा के अभिनव पहल छत्तीसगढ़ राज्य के सीमावर्ती जिला सरगुजा के बिशुनपुर सामुदायिक भवन स्थित राहत शिविर म देखे ल मिलीस।
इहां जिला प्रशासन सरगुजा ह विधिवत मिनी शाला लगाके 14 लइका मन के अध्ययन-अध्यापन के व्यवस्था करे हे। इहां ये बताना जरूरी हे के ए लइका मन ल पढ़ाए अऊ ड्राईंग-पेंटिंग सिखाए के काम जिला प्रशासन के सहयोग ले शिविर म रहत युवा श्री सतेन्द्र ऋषि कोति ले करे जात हे।
जानबा हे के अंबिकापुर नगर के बिशुनपुर, प्रतीक्षा बस स्टैण्ड अऊ सरगवां हॉस्टल म लगाए गे राहत कैम्प मन म मध्यप्रदेश, झारखण्ड, उत्तरप्रदेश, बिहार, उड़ीसा के कुल 108 श्रमिक अउ आन मनखे ठहरे हें। ऊंखर संग शिविर म लइका घलोक रहत हें। शिविर म रहत श्रमिक मन बर जिला प्रशासन कोति ले निःशुल्क नास्ता, भोजन अउ चिकित्सा सुविधा उपलब्ध कराए के संगेच ऊंखर लइका मन के समय के सदुपयोग अउ ऊंखर शिक्षा बर मिनी शाला लगाके अध्ययन-अध्यापन के सराहनीय व्यवस्था घलोक करे गए हे। मिनी शाला के संचालन म शिविर म रहत शिक्षित युवा घलोक बराबर के सहभागी बने हे। लइका मन के पढ़ाई बर जिला प्रशासन कोति ले ब्लैक बोर्ड, चाक, पेंसिल, किताब अऊ खेल सामान, बैट, बाल, फिसल पट्टी आदि के व्यवस्था करे गए हे। शिविर मन म रूके मनखे मन के मनोरंजन बर टी.व्ही. अउ कैरम बोर्ड के व्यवस्था करे गए हे।
