- मुख्यमंत्री सुपोषण अभियान के तहत 3.34 लाख हितग्राही मन ल सूखा राशन
- सियान, निराश्रित, जरूरतमंद मन के स्वास्थ्य अऊ सुरक्षा के पुख्ता व्यवस्था
- कोरोना ल हराए बर मुख्यमंत्री ले लेके कार्यकर्ता तक सबो दिन-रात सक्रिय
- मंत्री श्रीमती भेंड़िया ह लॉकडाउन के समय उठाए गए विभागीय कदम मन के बारे म प्रेसवार्ता म दीन जानकारी
रायपुर, 18 अप्रैल 2020। महिला अउ बाल विकास अऊ समाज कल्याण मंत्री श्रीमती अनिला भेंड़िया ह आज ऑनलाइन एप के संग वीडियो कॉन्फ्रेंसिंग ले मीडिया प्रतिनिधि मन ले चर्चा करिन। उमन मीडिया ल छत्तीसगढ़ म कोरोना आपदा के समय राहत बर उठाए गए विभागीय कदम मन के संबंध म जानकारी दीन। श्रीमती भेंड़िया ह बताइन के प्रदेश म कोरोना वायरस ल हराए बर मुख्यमंत्री श्री भूपेश बघेल ले लेके सबो कार्यकर्ता दिन-रात लगे हें। मुख्यमंत्री श्री भूपेश बघेल कोति ले टेलीफोन के माध्यम ले नियमित मॉनीटरिंग करे जात हे। एखरे संग खुद ऊंखर अऊ विभागीय सचिव, अधिकारी मन ले वस्तुस्थिति के लगातार जायजा लेहे जात हे। श्रीमती भेंड़िया ह कोरोना आपदा ले निपटे म मीडिया के सक्रिय सहयोग बर घलोक ओ मन ल धन्यवाद दीन। ये बेरा म महिला अउ बाल विकास विभाग के सचिव श्री सिद्धार्थ कोमल सिंह परदेशी, समाज कल्याण विभाग के सचिव श्री प्रसन्ना आर. अऊ महिला अउ बाल विकास विभाग के संचालक श्री जन्मेजय महोबे घलोक उपस्थित रहिन।
