रायपुर : अभी हाल के कोरोना खतरा ह हमला अपन जीए के रंग ढंग ल बदले बर मजबूर कर देहे हे, कहूँ हम आज नइ बदलेन त हमर अस्तित्व ही ह खतरा म पर जाही, ये कहना हे छत्तीसगढ़िया क्रान्ति सेना के प्रदेश अध्यक्ष श्री अमित बघेल के। उमन कहिथें के बहुत अकन संगठन हमला शाकाहार या संयमित भोजन करे के सलाह देवत हें, त कोनो सामाज म छट्टा-छट्टा रहे के शिक्षा देवत हें, छतीसगढ़िया क्रान्ति सेना के ये कहना हे, के हमार प्रदेश म जतका कोरोना के प्रकरण आए हे, वो सब के सब आन देश या आन प्रदेश ले प्रवास करके पहुंचे मनखे मन ही लाए हें। कोरोना के रोकथाम बर सरकार कोति ले पहलिच कदम प्रदेश के सीमा मन ल सील करके, रेलवे स्टेशन, बस अड्डा, एयरपोर्ट ल बंद करके उठाए गए हे। काबर न इही अवधारणा ल आगू बढ़ात हमर प्रदेश सरकार अइसन नीति मन के निर्माण करय जेखर से भविष्य म अवइया अइसन संकट मन ले सरलता ले निपटे जा सकय। सामान्य दिन म एक संघीय गणराज्य म ये संभव नइ हे, के हम अपन प्रादेशिक भौगोलिक सीमा म कड़ाई कर लेवन फेर हम अइसन नीति जरुर बना सकत हन, जेखर से हमार प्रदेश के असल निवासी अकुशल, कुशल श्रमिक मन ले लेके उच्चशिक्षित अभियंता, प्रबंधक, प्राशासनिक अधिकारी मन ल नौकरी बर आन प्रांत जानाच झन परय।
अमित बघेल के बताती क्रान्ति सेना के आंकड़ाबद्ध अध्ययन हे के छत्तीसगढ़ के उद्योग, व्यावसायिक प्रतिष्ठान, शिक्षा संस्थान मन अऊ प्रशासन म जतका आन प्रांत के मनखे काम करत हें। वो जगा मन ल छत्तीसगढ़ के यथायोग्य स्थानीय मनखे मन ले बड़ सरलता ले भरे जा सकत हे, उंखर सबो प्रकार के अर्हता मन ल पूरा करे म छत्तीसगढ़ के असल निवासी पूर्णतः सक्षम हे। उदाहरण बर भवन निर्माण कला म छतीसगढ़िया श्रमिक मन के देशभर म लोहा माने जाथे, फेर छत्तीसगढ़ म चलत भवन निर्माण काम मन म दूसर राज्य के श्रमिक मन ले काम कराए जात हे। अपन प्रदेश के अवसर ल बिगर मतलब के परप्रांत के मनखे मन ले भरे के सेती आज लाखों के संख्या म छत्तीसगढ़ के मनखे या तो बेरोजगार हें या बाहिर जाके काम करे ल मजबूर हें अऊ ओ मन आज के संकटकालीन स्थिति मन म आन राज्य मन म भूख ले बिलखत परे हें या पैदल चलत चलत सड़क मन म प्राण त्यागत हें। ठीक इही स्थिति आन राज्य के मनखे मन के घलोक हे जऊन आज महामारी के सेती छत्तीसगढ़ छोड़के बाहिर जावत हें। परिणाम ये हे के छत्तीसगढ़ राज्य संग प्रवासी मन के संगे-संग प्रदेश के सरकार मन घलोक चिंतित अऊ परेशान हें। ओ सबो मनखे मन अभी हाल बीमारी ल एक राज्य ले दूसर राज्य म खतरनाक ढंग ले प्रसारित करत हें।
अमित बघेल आगू कहिथे के हम एक सकारात्मक सोच के संग आगू बढ़त, छत्तीसगढ़ सरकार ले ये आग्रह करत हवन के “मोर राज मं मोर रोजगार” के शुरूआत अभी हाल म कोरोना ले बंद परे उद्योग मन ले करे जा सकत हे। ए उद्योग मन ले जऊन श्रमिक अपन मूल प्रदेश म लहुट गे हें ओ मन ल ऊंखर अपन राज्य के उद्योग म एडजस्ट होए बर छोड़ दे जाय। छत्तीसगढ़ के उद्योग म नवा सिरा ले जहां तक संभव हो सकय छत्तीसगढ़ के असल निवासी मन ल कानून नियुक्ति दे बर उद्योगपती मन ल आदेशित करे जाय। एखर से छत्तीसगढ़ म लाखों खरचा करके शिक्षित होए बेरोजगार युवा पीढ़ी के बेरोजगारी के समस्या हमेशा बर दूर हो जाही। हर साल होवत पलायन ले सरकार के होवइया किरकिरी घलोक रुक जाही, सरकार केवल अतकेच निगरानी कायम रखय के नियोक्ता श्रमिक मन ल श्रम कानून के तहत उचित पारिश्रमिक देवत हे के नहीं। सरकार कहूँ “मोर राज मं मोर रोजगार” के अवधारणा ल लेके ये कदम उठाथे त छत्तीसगढ़िया क्रान्ति सेना ये बात ताल ठोक के कहि सकत हे के छत्तीसगढ़ के एको मजदूर न पलायन करही, न कोनो बीमारी ले मरही, भलुक सब मिलजुल के सरकार के राजस्व अऊ छत्तीसगढ़ के तरक्की बर काम करहीं।
