दुर्ग 06 मई 2020। नगर पालिक निगम भिलाई के आयुक्त श्री ऋतुराज रघुवंशी ह मुख्य कार्यालय स्थित कई विभाग के जांच मास्क अउ सोशल डिस्टेंस ल लेके करिन। लॉक डाउन के समय सोशल डिस्टेंस अउ मास्क के अनिवार्यता ल देखत आज आयुक्त श्री रघुवंशी ह विभाग मन के निरीक्षण करिन अऊ हरेक विभाग म जाके मास्क के जायजा लीन। ये बेरा म डाटा सेंटर म कुछ कर्मचारी मन मास्क होए के बाद घलव पहिरे नइ रहिन, जेमन ल फटकार लगाके मास्क पहिरे के हिदायत कमिश्नर ह दीन। आयुक्त महोदय सबले पहिली स्टेनो कक्ष पहुंचिन, संपत्तिकर, जलकर वसूली काउंटर, पेंशन शाखा, भवन अनुज्ञा शाखा, स्वास्थ्य विभाग, योजना शाखा, राजस्व, सचिवालय, जनसंपर्क विभाग, अधीक्षण अभियंता कक्ष, डाटा सेंटर, लेखा शाखा, राष्ट्रीय शहरी आजीविका मिशन संग कई विभाग के कक्ष के जांच करिन अउर अधिकारी कर्मचारी मन ल स्वच्छता बनाए रखे के निर्देश दीन। स्वास्थ्य विभाग के अधिकारी मन ले कार्यालय म सैनिटाइजिंग के जानकारी पूछिन।
आप मन जानतेच होहू के निगम के मुख्य कार्यालय म प्रवेश करे म थर्मल स्क्रीनिंग ले तापमान के जांच करे जात हे, भीड़ ल नियंत्रित करे बर मुख्य कार्यालय के प्रवेश द्वार म 1 मीटर के दूरिहा म कुर्सि लगाए गए हे जिहां बइके नागरिक अपन काम बर इंतजार कर सकत हें। टैक्स जमा करे बर अलग से काउंटर बनाए गए हे। निगम मुख्य कार्यालय म मास्क लगाए मनखे ल ही प्रवेश देहे जात हे। निगम भिलाई ह सोशल डिस्टेंस मेंटेन करे बर पुख्ता इंतजाम करे हे जेखर जांच आज आयुक्त महोदय ह करिन। जांच के समय उपायुक्त अशोक द्विवेदी अउ तरुण पाल लहरें, स्वास्थ्य अधिकारी धर्मेंद्र मिश्रा अउ सहायक स्वास्थ्य अधिकारी जावेद अली मौजूद रहिन।
