छत्तीसगढ़ शासन अउ जिला प्रशासन ल दीन धन्यवाद
जशपुरनगर 14 मई 2020। कलेक्टर श्री निलेश कुमार महादेव क्षीरसागर के मार्गदर्शन म लाकडाउन के बेरा म आन राज्य मन म फसे जशपुर जिला के श्रमिक मन, छत्तीसगढ़ शासन अउ जिला प्रशासन के मदद ले जब अपन गृह ग्राम पहुंचिन त वोकर खुशी उंकर आंखी म साफ झलकत रहिस। जशपुर विकासखंड के ग्राम टिकैटगंज के राजेन्द्र साहू, बंधन साहू आन राज्य हैदराबाद म काम करे गए रहिन। लाकडाउन के सेती उहां फस गे रहिन। ओ मन ल अपन गृह ग्राम आए म समस्या आत रहिस। उहें जशपुर ब्लाक के ग्राम पोड़ी पोस्ट लोदाम के सत्यवती भगत अऊ ग्राम रतिया के सविता दुनों लड़की हैदराबाद म प्लैसमेंट के तहत् एक होटल म दू साल ले काम करत रहिन। उमन बताइन के कोरोन वायरस संक्रमण के सेती घबराहट होए लगीस अऊ अपन परिवार के सुरता आए लगिस। मजदूर मन अउ लड़की मन ह बताइन के उमन ल छत्तीसगढ़ शासन ह अपन राज्य के मजदूर मन ल वापस लाय बर ट्रेन चलावत हे ए बात के तको जानकारी मिलीस त उमन जिला प्रशासन के हेल्पलाईन नंबर म संपर्क करके अपन पंजीयन कराए रहिन।
सत्यवती भगत, सविता, राजेन्द्र साहू, बंधन साहू ह छत्तीसगढ़ शासन अउ जिला प्रशासन ल धन्यवाद देवत कहिन के प्रशासन के मदद ले हम सबो सकुशल अउ सुरक्षित अपन गृह ग्राम पहुंच गएन अऊ ओ हमन ल अड़बड़ खुशी घलोक होवत हे।
जशपुर सीईओ जनपद श्री पी.के.मरकाम ह बताइस के जशपुर विकासखंड म करीबन 65 क्वारेंटाईन सेंटर बनाय गए हे। सेंटर म मजदूर मन बर भोजन, पानी, बिजली, शौचालय संग सबो बुनियादी सुविधा हवश्। आन राज्य ले अवइया मजदूर मन ल ऊंखर विकासखंड म मेडिकल जांच करे जात हे। अऊ ओ मन ल ऊंखर गांव के नजदीक बने क्वारेंटाईन सेंटर म 14 दिनों बर क्वारेंटाईन म रखे जात हे। ये दौरान मेडिकल टीम ह सरलग उंखर निगरानी घलोक रखत हे।
