रायपुर, 19 मई 2020। छत्तीसगढ़ राज्य म न्यूज वेबसाइट मन ल विज्ञापन देहे बर लागू करे गए मापदण्ड उपर आधारित पारदर्शी आनलाईन व्यवस्था आन राज्य मन बर एक मिशाल हे। छत्तीसगढ़ सरकार ह न्यूज पोर्टल मन ल विज्ञापन देहे बर नियम अऊ मापदण्ड तय करे हे। इही नियम अऊ मापदण्ड के आधार म दू समिति मन के माध्यम ले परीक्षण के बादेच न्यूज वेबसाईट ल विज्ञापन जारी करे जात हे।
छत्तीसगढ़ राज्य म न्यूज वेबसाइट अऊ पोर्टल मन ल विज्ञापन देहे बर न केवल नवा पालिसी बनाए गए हे भलुक ये पालिसी पूरा पारदर्शी रहय एखर बर एला पब्लिक डोमेन म आनलाईन घलोक करे गए हे। ये व्यवस्था ले जिहां फर्जी वेबसाइट अऊ वेबपोर्टल मन उपर लगाम लगे हे उहें सही वेबसाईट अऊ पोर्टल मन ल एकर पूरा लाभ मिलत हे।
छत्तीसगढ़ जनसंपर्क ले न्यूज वेबसाईट अऊ पोर्टल मन म विज्ञापन देहे बर आनलाईन आवेदन लेहे जाथे। विज्ञापन बर न्यूज वेबसाइट अउ न्यूज वेबपोर्टल मन ले Website Advertisement Request म आनलाईन आवेदन हर महिना मंगाये जाथे। पारदर्शिता बर विज्ञापन नियम घलोक वेबसाईट म उपलब्ध हे। आनलाईन आवेदन मन म विज्ञापन नियमावली के मापदण्ड के आधार म गूगल एनेलेटिक संग आन प्रावधान ले समिति ह चेक करथे।
दू स्तर म आवेदन मन के होथे हे परीक्षण- छत्तीसगढ़ जनसंपर्क कोति ले गूगल एनेलेटिक रिपोट अऊ आन तकनीकी पहलु मन के परीक्षण बर राष्ट्रीय सूचना विज्ञान केन्द्र (एन.आई.सी.) अऊ ब्राडकास्ट इंजीनियरिंग कंसलटेंट इंडिया लिमिटेड (बेसिल) के विशेषज्ञ अधिकारी मन ल एखर जिम्मेदारी देहे गए हे। संगेच जनसंपर्क संचालनालय म वरिष्ठ अधिकारी मन के एक समिति घलोक गठित करे गए हे। एनआईसी अऊ बेसिल के एक्सपर्ट अधिकारी मन गूगल एनेलेटिक रिपोट अऊ आन पक्ष के सेवा लेके जरूरी परीक्षण करथे। एखर बाद जनसंपर्क संचालनालय म गठित समिति के सदस्य मन विज्ञापन नियम के मापदण्ड के आधार म पात्र न्यूज वेबसाइट मन ल विज्ञापन देहे के अनुशंसा करे जाथे। प्रदेश सरकार ले राज्य म लागू करे गए ये आनलाईन पारदर्शी व्यवस्था के न्यूज वेबसाईट अऊ न्यूज वेब पोर्टल संचालक मन अड़बड़ सराहना करत हें।
