– गौठान मन म नवाचार के मौका ल बढ़ाए बर मिलही मदद, नरवा, गरूवा, घुरूवा, बाड़ी योजना ल घलोक निखारे म मिलही मदद
दुर्ग, 20 मई 2020। डीएमएफ के पाछू बैठक म लेहे गए निर्णय मन के असर अब देखे ल मिले लगे हे। पउर साल डीएमएफ के माध्यम ले जिला अस्पताल के अधोसंरचना ल बढि़या करे बर बहुत अकन काम काम कराए गए रहिस जेकर बढि़या नतीजा आगू आए रहिस। ये पइत येकर बर फोकस किसानी के बेहतरी उपर करे गए हे। करीबन 8 करोड़ रुपए के राशि कृषि के बेहतरी बर लगाए गए हे। ये मां चारागार मन के विकास म विशेष काम करे जाही, एखर से पशुधन संवर्धन तो होहीच, एखर माध्यम ले जैविक खेती के रद्दा घलोक खुलही अऊ फसल के घलोक मवेसी मन ले रक्षा हो सकही।
चारागाह मन बर बीज, सिंचाई के व्यवस्था संग स्वसहायता समूह के माध्यम ले होही विकास– सामुदायिक चारागाह मन के विकास म बड़का बाधा पानी के सरलग पूर्ति के होथे, एखर बर एक करोड़ 75 लाख राशि के 100 सामुदायिक चारागाह मन म सिंचाई बर बोरवेल करे अउ पंप लगाए बर रखे गए हे। चारागाह विकास बर अब तक स्वसहायता समूह मन ह कमाल के काम करे हें, एला प्रोत्साहित करे बर अनुदान प्रदान करे बर 47 लाख रुपिया रखे गए हे। 119 सामुदायिक चारागाह मन म जमीन सुधार, जुताई अउ बीज बर आठ हजार रुपिया प्रति एकड़ के दर ले औसत पांच एकड़ तक प्रति चारागाह बर चालीस हजार रुपिया रखे गए हे। चारागाह मन बर बीज बाहिर ले झन मंगाना परय, उचित गुणवत्ता वाले बीज इहें उपलब्ध हो जावय एखर बर बीज उत्पादन विकास कार्यक्रम बर 17 लाख रुपिया के राशि रखे गए हे। एखर बर केवीके पाहंदा म 5 एकड़ म चारा बर मक्का, नैपियर घास, काउपी, सोरगम के उन्नत बीज उत्पादन बर 17 लाख 35 हजार के प्रावधान करे गए हे।
खेत के मेड़ म राहेर के विकास– खेत के मेड़ मन अनुपयोगी होथे। वोमा राहेर के फसल उगाए के योजना बनाए गए हे। एखर बर 25 लाख रुपिया के प्रस्ताव बनाए गए हे। करीबन 20 हजार हेक्टेयर क्षेत्र ल एखर बर चुने गए हे। एकर उद्देश्य फसल वैविध्य ल बढ़ावा देना हे।
9 बायो गैस प्लांट घलव– बायोगैस के संभावना मन ल बढ़ावा देहे बर घलोक प्रस्ताव आए हे। ये मा हर ब्लाक म तीन जगा म बायोगैस प्लांट लगाए जाही। ये 10 घनमीटर के बायोगैस संयंत्र होही। ये मा पाइपलाइन स्थापना के काम घलोक होही। एखर लागत करीबन 54 लाख रुपिया होही। बायोगैस प्लांट अइसन गौठान मन म लगाए जाही जिहां पशुधन के संख्या जादा होही। घरेलू गैस के खर्च ल बचाय अउ बड़े आबादी ल बायोगैस पहुंचाए बर ये परयोग मील के पत्थर साबित होही।
स्प्रिंकलर अऊ ड्रिप घलव– सामुदायिक बाड़ी अउ चारागाह म स्प्रिंकलर अउ ड्रिप सिंचाई के सुविधा उपलब्ध कराए के प्रस्ताव घलोक रखे गीस। एखर बर हर एक ब्लाक ले 10 सामुदायिक बाड़ी मन के चयन करे गए हे। सामुदायिक चारागाह मन बर 119 जगा के चयन करे गए हे। 87 गौठान मन म ट्रैविस, पैराकुट्टी अउ स्प्रेयर के स्थापना बर 68 लाख रुपिया के राशि रखे गए हे।
