राजनांदगांव के किसान मन ह मुख्यंमत्री सहायता कोष म दीन 69 हजार रुपिया के राशि
राजनांदगांव, 27 मई 2020। मुख्यमंत्री श्री भूपेश बघेल ले आज इहां ऊंखर निवास कार्यालय म श्री पद्म कोठारी के नेतृत्व म राजनांदगांव के किसान मन के प्रतिनिधि मंडल ह सौजन्य मुलाकात करिन। प्रतिनिधिमंडल के किसान मन ह राजीव गांधी न्याय योजना के शुरुआत करके किसान मन ल आर्थिक सम्बल प्रदान करे बर मुख्यमंत्री के आभार जताइन। ये बेरा म किसान मन ह राजीव गांधी न्याय योजना के तहत ऊंखर खाता म आए पहली किश्त के बोनस राशि ले 69 हजार रुपिया के राशि के चेक मुख्यमंत्री ल सौंपिन। ये राशि कोरोना महामारी के समय छत्तीसगढ़ सरकार कोति ले करे जात बचाव अउ नियंत्रण के मुहिम म सहयोग बर मुख्यमंत्री सहायता कोष म जमा कराए जाही।
मुख्यमंत्री श्री भूपेश बघेल ह किसान मन कोति ले ये विपति के घड़ी म देहे गए ये योगदान के सराहना करत कहिन के ये ह ये बात के सबूत हे के छत्तीसगढ़ के किसान कतका उदार हे, ये सरकार किसान मन के सरकार ये, जऊन हर हाल म किसान मन के संग खड़े हे। ये बेरा म राजनांदगांव के किसान श्री राजभान लोधी, श्री कमलेश्वर वर्मा, श्री मोती लाल साहू अऊ श्री भागवत साहू उपस्थित रहिन।
