रायपुर, 28 मई 2020। मुख्यमंत्री श्री भूपेश बघेल ह आज इहां राजधानी स्थित अपन निवास कार्यालय म शोभा टाह फाउण्डेशन बिलासपुर कोति ले अत्याधुनिक तकनीक ले निर्मित ’रोबोट नर्स’ के शुभारंभ करिन। श्री बघेल ह सुरक्षात्मक दृष्टि ले बेहतर उपयोग बर निर्मित ये ’रोबोट नर्स’ ल एम्स (अखिल भारतीय आयुर्विज्ञान संस्थान) रायपुर के कोविड-19 वार्ड म उपयोग बर मौका म ही सौंप दीन। मुख्यमंत्री श्री बघेल ह अत्याधुनिक तकनीक ले निर्मित रोबोट नर्स के खोज बर शोभा टाह फाउण्डेशन बिलासपुर के सराहना करिन अऊ एला कोविड-19 अऊ कई ठन संक्रामक बीमारी मन ले बचाव बर बहुत उपयोगी बताइन।
ये रोबोट नर्स एक पईत म एक निश्चित दूरी करीबन 90 फीट के लंबाई तक सामान के आदान-प्रदान सेवा जइसे मानवीय क्रियाकलाप म सक्षम हे अऊ वार्ड म बिना मानव के मरीज तक जरूरी दवई, कपड़ा संग खान-पान के चीज मन ल पहुंचाए के संगें-संग वापस लाय के सुविधा वाला हे। एखर संगेच रोबोट नर्स के माध्यम ले अस्पताल म चिकित्सक अऊ मरीज के बीच कैमरा अऊ मोबाइल के फोटो, वीडियोग्राफी, वीडियोकॉलिंग अऊ चैटिंग आदि घलोक करे जा सकही। एखर बर चिकित्सक ल मरीज तीर जाय के जरूरत नइ होही। एकर से बिना मनखे के रोबोट नर्स के माध्यम ले मरीज तक जरूरी सुविधा अउ सेवा जल्दी से जल्दी पहुंचाए जा सकही। एखर से अभी हाल म कोरोना वायरस (कोविड-19) के संक्रमण ले बचाव बर अस्पताल म कार्यरत चिकित्सक, नर्स अऊ सफाईकर्मी आदि मनखे मन ल घलोक इलाज आदि के काम मन म काफी सहूलियत होही। ये बेरा म टाह फाउण्डेशन ले जुड़े श्री सतीश कुमार, श्री अमर गिर्दवानी अऊ एम्स रायपुर के मेडिकल सुपरिटेंडेंट डॉ. करण पीपरे आदि उपस्थित रहिन।
