- – कलेक्टर श्री सर्वेश्वर नरेंद्र भूरे ह दीन निर्देश, शंकराचार्य हास्पिटल म तैयारी मन के करिन निरीक्षण
दुर्ग, 31 मई 2020। अवइया समय म दुर्ग जिला के कोनो मनखे कहूं कोरोना पाजिटिव पाये जाही तेकर उपचार शंकराचार्य हास्पिटल म होही। ये संबंध म तैयारी पूरा कर ले गए हे। कलेक्टर श्री डॉ. सर्वेश्वर नरेंद्र भूरे ह आज हास्पिटल के निरीक्षण करिन अऊ उहां नियुक्त अमला ले तैयारी मन के संबंध म चर्चा करिन। अधिकारी मन ह बताइन के सबो तैयारी पूरा कर ले गए हे। एसओपी के मुताबिक इलाज बर हास्पिटल पूरा तइयार हे। चिकित्सक अऊ नर्सिंग स्टाफ के पाली म ड्यूटी लगा देहे गए हे। इंकर कार्यदिवस अऊ एखर बाद क्वारंटीन के दिन घलोक निरधारित कर दे गए हे। निरीक्षण के समय सीएमएचओ डाक्टर गंभीर सिंह ठाकुर, एसडीएम श्री खेमलाल वर्मा संग आन अधिकारी उपस्थित रहिन।
इहां 113 बेड हे जेमा 15 आईसीयू के हे- अधिकारी मन ह बताइन के इहां 113 बेड रखे गए हे। ये मा आईसीयू बर 15 बेड, 31 बेड एचडीयू अऊ 65 जनरल वार्ड के बेड हे। एखर अकतहा 32 बेड रिजर्व रखे गए हे। कलेक्टर ह सबो वार्ड अउ आईसीयू के निरीक्षण करिन। अस्पताल म लैब आदि के घलोक सुविधा हे। कलेक्टर ह हाउसकीपिंग संग आन जानकारी घलोक लीन। उमन कहिन के ड्यूटी रोटेशन अऊ सबो के दायित्व के बारे म एसओपी के मुताबिक काम करव। सीएमएचओ ह बताइस के एखर बर चार बैच लगाए गए हे। पेशेंट के पाजिटिव चिन्हांकित होतेच इहां तक लाय अउ भर्ती कराए के पूरा प्रक्रिया निरधारित कर ले गए हे।
एन्ट्री प्वाइंट ले बेड तक कोन अउ जइसे एसओपी होही – कलेक्टर ह अपन निरीक्षण के बेरा म सुरूच म स्वास्थ्य अमला ले पूछिन के बतावव कोनो पाजिटिव मरीज या उंखर देखरेख बर स्टाफ आही त इहां ले कइसे आगू जाही। अमला ह बताइस के एंट्री प्वाइंट म ही थर्मल स्कैनर अउ आन जांच उपकरण के व्यवस्था हे। एखर पाछू आगू के विस्तार ले जानकारी उमन कलेक्टर ल दीन।
गर्भवती पाजिटिव महिला आही त डिलीवरी के व्यवस्था घलव– अस्पताल म ओ हालत के तैयारी घलोक रखे गए हे जब कोनो पाजिटिव गर्भवती महिला आही अऊ ओखर प्रेग्नेंसी के समय बिल्कुल करीब हे। अइसन स्थिति म नार्मल अऊ सीजेरियन दुनों प्रकार के डिलीवरी के सुविधा घलोक अस्पताल म रइही।
एम्स म स्टाफ के हो गए हे ट्रेनिंग– कोविड हास्पिटल कोन प्रकार ले काम करही, पेशेंट के ट्रीटमेंट कोन प्रकार ले होना चाही। संक्रमण के रोकथाम बर का-का अउ कइसे सावधानियां बरतना हे। ए सबो के ट्रेनिंग ड्यूटी म लगाए गए अधिकारी-कर्मचारी मन के हो गए हे। एखर अलावा वीडियो कांफ्रेंसिंग के माध्यम ले ट्रेनिंग घलोक हो गए हे। अस्पताल ल पूरा तरा ले सैनिटाइज करे गए हे अऊ सरलग सैनिटाइजेशन अउ कोविड संक्रमण ल थामे के आन उपाय सरलग करे जाही। अस्पताल म पीपीई किट, एन-95 मास्क अउ उपचार बर आन जरूरी सबो सुविधा पूरा उपलब्ध हे।
