- जल सोत मन ल सहेज करके देहे गीस पक्का कुवा के स्वरूप
- स्वच्छ पेयजल के संगे संग द्विफसली कृषि ह बदलीस क्षेत्र के तस्वीर
कोण्डागांव, 03 जून 2020। दण्डकारण्य के केशकाल के घाटी के पहाड़ी मन म रहइया मनखे सुलझे अउ सरल व्यक्तित्व के धनी हें। ए पहाड़ी मन ले वइसे तो कई नाला अउ नदिया निकलथे जेमा दूध, बारदा, भंवरडीह, जइसे नदी मन सामिल हे। जऊन न जाने कतनो के प्यास बुझाथे फेर इंकर उदगम स्त्रोत म रहइया मन प्यासे रहि जाथें। अइसनहे गांव म सामिल हे कुएंमारी, मिरदे, चर्रेबेड़ा कुम्मुड, भंण्डारपाल, माढ़गांव, बेड़मा, मारी जइसे कुछ नाम। ए गांव मन म आज ले कुछ साल पहिली तक गरमी आतेच इहां के स्थिति ये हो जात रहिस के पानी लाय बर महिला मन ल कई किलोमीटर पैदल सफर करना परत रहिस। अइसन स्थिति ल देखत जिला प्रसासन ह साल 2016-17 ले संयुक्त रणनीति अपनाके ए क्षेत्र के मनखे मन के दिक्कत ल खतम करे के बीड़ा उठाइस।
