अम्बिकापुर मेडिकल कॉलेज ले कैदी भागिस, रेप के आरोप म मिले रहिस आजीवन कारावास के सजा

अंबिकापुर,05 जून 2020। रेप के आरोप म सजा काटत एक कैदी बिहनिया पुलिस वाला मन ल चकमा देके भाग गिस. जब तक कैदी के भाग जाये के खबर पुलिसकर्मी मन ल लगिस, तब तक वो उंखर नजर ले बहुत दूर जा चुके रहिस. अब पुलिस कैदी के खोज म जुटगे हे. ये पूरा मामला अंबिकापुर के हे. जानकारी के अनुसार कैदी के नाम दिलभर उर्फ जोधा हे, जोन ह करौली थाना झिलमिली जिला सूरजपुर के रहईया हे. 27 फरवरी ले रेप के आरोप म सजा काटत हे. 3 मार्च के उप जेल सूरजपुर ले स्थानांतरण करके अंबिकापुर सेंट्रल जेल म भेजे गे रहिस. ओखर तबीयत खराब होय म ओला अंबिकापुर मेडिकल कॉलेज म 3 जून के भर्ती कराये गिस, जिहां ले आज बिहनिया इलाज के बेरा पुलिस ल चकमा देके आरोपी बंदी अस्पताल ले भाग गिस. अंबिकापुर जेल अधीक्षक ह आरोपी कैदी के पुलिस कस्टडी ले भाग जाये के जानकारी पुलिस विभाग के उच्च अधिकारी मन ल घलो दे देहे. संग ही आरोपी के खोज करे जावत हे.