टीकाकरण, जरूरी दवाई, फल संग पौष्टिक भोजन के पुख्ता व्यवस्था
जांजगीर-चांपा, 06 जून 2020। गर्भवती महिला मन के देखभाल अऊ सुरक्षा एक नैतिक जिम्मेदारी माने जाथे। एकर ध्यान रखत राज्य सरकार कोति ले क्वारंटाइन सेंटर्स म रहत गर्भवती महिला मन के विशेष देखभाल अऊ स्वास्थ्य सुविधा उपलब्ध करवाए के निर्देश देहे गए हे। चिकित्सा जांच, परामर्श ले लेके गर्भवती महिला मन के रूचि के मुताबिक पौष्टिक भोजन देहे के व्यवस्था करे गए हे।
जांजगीर-चांपा जिला के कई ठन क्वारंटाइन सेंटर्स म रहत 479 गर्भवती महिला मन ल विशेष स्वास्थ्य सुविधा अऊ महिला अउ बाल विकास विभाग के योजना के तहत पौष्टिक आहार उपलब्ध कराए जात हे। ए महिला मन के नियमित स्वास्थ्य परीक्षण बर चिकित्सा टीम ल घलोक तैनात करे गए हे। कलेक्टर श्री यशवंत कुमार के मार्गनिर्देशन म जिला प्रशासन कोति ले ए गर्भवती श्रमिक महिला मन म ले 147 ल विशेष देखभाल बर जिला मुख्यालय के चिन्हांकित क्वारंटाइन सेंटर म रखे गए हे। स्वास्थ्य विभाग के टीम ह ए सबो महिला मन के टीकाकरण, हीमोग्लोबिन अऊ कोरोना टेस्ट करे हें। एखर संगेच आयरन अऊ कैल्शियम के टेबलेट घलोक देहे गए हे, जेखर से ए महिला मन म पोषक तत्वों के कमी झन होवय। गर्भवती महिला मन ल उंखर दिनचर्या नियमित करे अऊ जरूरी सावधानी बरते के घलोक परामर्श देहे जात हे। सबो गर्भवती महिला मन ल खुश रहे अऊ पौष्टिक भोजन करे के सलाह देहे जात हे। व्यक्तिगत साफ-सफाई अऊ खुद के देखभाल उपरम ध्यान केंद्रित करे संबंधी जानकारी देहे जात हे।
