जिंकर कार्ड नइ हे अइसे प्रवासी श्रमिक मन ल मिलत हे निःशुल्क राशन

बलौदाबाजार, 7 जून 2020। मुख्यमंत्री श्री भूपेश बघेल के हुकुम म प्रदेश म आन राज्‍य ले छत्तीसगढ़ वापस लहुटे श्रमिक अऊ मनखे मन ल, जिंकर नाम म कोनो राशनकार्ड नइ हे या कोनो राशनकार्ड म उंखर नाम दर्ज नइ हे, वो मन ल महिना मई अऊ जून बर 5 किलो चावल प्रति मनखे प्रति महिना के दर ले अऊ 1 किलो चना प्रति परिवार प्रति महिना के दर ले निशुल्क देहे जाही। एखर बर सबो जनपद कार्यालय म अऊ नगर पंचायत कार्यालय मन म अइसे प्रवासी श्रमिक मन के पहिचान करके ऑनलाइन एन्ट्री के काम करे जात हे। योजना के लाभ केवल अइसन प्रवासी श्रमिक मन ल देहे जाही, जिंकर नाम कोनो राशनकार्ड मे दर्ज नइ हे।

इही कड़ी म बलौदाबाजार शहर के नगर भवन के तीर के उचित मूल्य के दुकान ले जुन्ना बस्ती निवासी सोनाली नवरंगे के 3 सदस्यीय परिवार ल ये योजना के तहत निशुल्क खाद्यान्न के लाभ देहे गए हे। वो एक महीना के 15 किलोग्राम चावल उठाए हे। खाद्यान्न मिले के बाद परिवार के आगू अब खाए के समस्या नइ होवय। उंखर जिंदगी कोरोना काल म घलोक आसान हो गए हे। प्रवास ले वापस लहुटे के बाद ये परिवार शहर के वार्ड 07 मे निवासरत हे। ओला 15 किलो चावल अऊ मिलही। सोनाली नवरंगे के जइसे कोनो प्रवासी श्रमिक जऊन ये योजना के अन्तर्गत पात्र हे, ये योजना के लाभ ले सकही। एखर बर वो प्रवासी श्रमिक जेखर नाम कोनो राशनकार्ड मे दर्ज नइ हे, अपन आधार नम्बर अऊ आन पहिचान पत्र कागद मन के संग ग्रामीण क्षेत्र बर अपन ग्राम सचिव के माध्यम ले सम्बंधित जनपद कार्यालय म अऊ नगरीय क्षेत्र मे नगर पालिका या नगर पंचायत कार्यालय म जानकारी प्रस्तुत कर सकहीं। जिहां उंखर डाटा एन्ट्री करे जायेगी। एखर बाद ओला ओखर क्षेत्र के सम्बंधित शासकीय उचित मूल्य के दुकान ले महिना मई अऊ जून बर निरधारित खाद्यान्न प्राप्त हो सकही। अभी हाल म जिला के सबो 6 जनपद अऊ 9 नगरीय निकाय मन म अइसन 485 परिवार के पहिचान करके 1072 मनखे के एन्ट्री पूरा कर लेहे गए हे।