जानवर मन ल रोकबो-छेकबो, किसानी ल बढ़ाबो, फायदा कमाबो : रोका-छेका अभियान के शुरूआत म उत्साहित ग्रामवासी

कोरबा, 20 जून 2020। मुख्यमंत्री श्री भूपेश बघेल के कहे म फसल ल चराई ले बचाय बर पूरा प्रदेश म शुरू होए रोका-छेका अभियान ले कोरबा जिला के ग्रामीण घलोक उत्साहित हें। जिला के सबो ग्राम पंचायत अऊ गौठान गांव मन म आज ये अभियान के शुरूआत होइस। स्थानीय विधायक, जनप्रतिनिधि मन के संगें-संग शासकीय अधिकारी-कर्मचारी मन ह घलोक ये अभियान के शुरूआत म अपन भागीदारी दीन। कोरबा जिला के चिर्रा ग्राम पंचायत के गौठान परिसर म रिमझिम बरसा के बीच मुंह म मास्क बांधे अऊ सोशल डिस्टेंसिंग मेन्टेन करत पचास ले जादा संख्या म गांव वाले मन अऊ गौठान समिति के सदस्य मन, स्व सहायता समूह मन के महिला मन ह पूरा उत्साह ले ये कार्यक्रम म हिस्सा लीन। गौठान समिति के सदस्य ललिता राठिया ह बताइस के सरकार कोनो कार्यक्रम शुरू करथे त मनखे जागरूक होथे। अपन फायदा बर मनखे ओ कार्यक्रम ल अपनाथे। रोका-छेका अभियान घलोक गांव वाले मन के फायदा के अभियान हे। ललिता राठिया ह बताइस के अब गांव के जानवर खुला म नइ छोड़े जाए, खेत अऊ बाड़ी मन म घुसके फसल अऊ साग भाजी ल नइ खावंय। बाहिर छुटे जानवर मन ल सीधा गौठान म छेके जाही अऊ पचास रूपिया जुर्माना वसूलके ही छोड़बो। ललिता राठिया ह बताइस के एखर से धान, सब्जी के उत्पादन जादा होही अऊ किसान मन ल जादा फायदा होही। जुर्माना के राशि ले पशु अऊ गौठान ल सक्षम बनाय जाही। गांव के माली हालत सुधरही। ललिता राठिया ह रोका-छेका अभियान बर मुख्यमंत्री श्री बघेल के आभार व्यक्त करिस।