धमतरी। प्रदेश के धमतरी जिला ले अनोखा मामला आगु आये हे, एक शादीशुदा महिला ल टिकटाॅक म वीडियो बनाने वाला एक युवक अतना पंसद आगे कि वो ओखर संग जीवन बिताये बर अपन सुखी परिवार ल छोड़ के कानपुर भाग गे.
ये मामला के जानकारी तब आगु आइस जब पति अउ परिजन मन ह महिला के गुमशुदगी के रिपोर्ट थाना म दर्ज कराईस. ये मामला धमतरी जिला के बठेना वार्ड के हे, जिहां रहने वाला एक लड़का के बिहाव कुछ साल पहली एक युवती के संग होय रहिस. बिहाव के बाद दुनो के वैवाहिक जीवन हंसी—खुशी से बीतत रहिस. इही बीच वो दू बच्चा मन के मां घलो बनिस लेकिन टिकटाॅक ह उंखर जिनगी म अइसे तूफान लाइस कि दुनो के शादीशुदा जिनगी ल बरबाद कर दीस.
बताये जावत हे कि महिला ल चाईनीज एप टिकटाॅक अब्बड़ पंसद हे. खुद टिकटाॅक म वीडियो बनाथे अउ शेयर घलो करथे. टिकटाॅक म महिला ह कानपुर के रहने वाला एक युवक ल फाॅलो करिस. फेर दुनो म दोस्ती होगे अउ फेर ये दोस्ती प्यार म बदल गे. प्यार के परवान अइसे चढ़िस कि वो अपन घर परिवार छोड़ के ओखर तिर चले गे. उहँचे पुलिस के मदद ले जब पति ह अपन पत्नी ले संपर्क करिस अउ अपन बच्चा मन ल उमन ल दे के बात कहिन त एखर बाद पत्नी रायपुर पहुंच के पुलिस ल बच्चा मन ल सौंप के वापस अपन प्रेमी के तिर कानपुर चले गे. कोतवाली पुलिस ह बच्चा मन ल पिता ल दे दीस हे.
