- अपेक्षित परिणाम प्राप्त नइ करइया पढ़ईया लईका मन ल नवा ऊर्जा अउ उत्साह के संग तैयारी करे के दीन समझाईश
- बेहतर परिणाम बर शिक्षक अऊ पालक मन ल दीन बधाई
रायपुर, 23 जून 2020। मुख्यमंत्री भूपेश बघेल ह छत्तीसगढ़ माध्यमिक शिक्षा मंडल कोति ले आज जारी कक्षा दसवीं, बारहवीं के परीक्षा म प्रावीण्य सूची म स्थान पवइया पढ़ईया लईका मन के संगें-संग सबो सफल पढ़ईया लईका मन ल शुभकामना अउ बधाई देहे हे।
मुख्यमंत्री श्री भूपेश बघेल ह हाई स्कूल सर्टिफिकेट मुख्य परीक्षा साल 2020 अऊ हायर सेकेण्डरी स्कूल सर्टिफिकेट मुख्य परीक्षा 2020 के साथ-साथ हायर सेकेण्डरी व्यावसायिक परीक्षा 2020 के सबो सफल पढ़ईया लईका मन के उज्जवल अउ सुनहरा भविष्य के मंगलकामना करे हें। उमन कहिन के जइसन पढ़ईया लईका मन ह ए बोर्ड परीक्षा मन के माध्यम ले जिन्दगी के एक अहम चरण म सफलता अर्जित करे हें, वइसनहे भविष्य म घलोक ओ मन जिन्दगी के हर क्षेत्र म सफलता अर्जित करयं अऊ अपन स्कूल, गांव, शहर के संगें-संग प्रदेश अऊ देश के नाम रोशन करयं।
मुख्यमंत्री ह परीक्षा म अपेक्षित परिणाम प्राप्त नइ कर सकइया छात्र-छात्रा मन ल बिना निराश होए पूरा धैर्य, हिम्मत अऊ मेहनत के संग सरलग पढ़ई करे के समझाईश दीन अऊ कहिन के ओ मन नवा ऊर्जा अउ उत्साह के संग तैयारी के संकल्प लेवयं। जेखर से ओ मन ल परीक्षा के संग जीवन म सफलता निश्चय मिलही। मुख्यमंत्री ह ये साल बेहतर परिणाम बर शिक्षक अऊ पालक मन ल घलोक बधाई अऊ शुभकामना देहे हें।
