संग्राहक मन ल भुगतान म देरी झन होवय : वन मंत्री श्री अकबर
रायपुर, 24 जून 2020। छत्तीसगढ़ म लघु वनोपज मन के समर्थन मूल्य म खरीदी के आंकड़ा लगातार बाढ़त हे। चालू सीजन के समय अब तक 73 करोड़ 53 लाख रूपिया के राशि के 2 लाख 84 हजार 182 क्विंटल लघु वनोपज मन के संग्रहण करे गए हे। अब तक संग्रहित लघु वनोपज मन म ले सबसे जादा संग्रहण साल बीज के होए हे। एकर निरधारित लक्ष्य 2 लाख क्विंटल के तीन चौथाई ले जादा अर्थात् एक लाख 60 हजार 290 क्विंटल साल बीज के संग्रहण हो चुके हे। आजीविका बर लघु वनोपज मन के संग्रह म निर्भर वनवासी परिवार ल एखर से लगातार काम मिलत हे। संगेच मुख्यमंत्री श्री भूपेश बघेल के नेतृत्व म राज्य सरकार कोति ले वनवासी परिवार मन के हित म 7 वनोपज मन ल बढ़ाके 31 वनोपज मन के समर्थन मूल्य म खरीदी के निर्णय ले ए परिवार मन के आमदनी घलोक ये साल बाढ़ही। वन मंत्री श्री मोहम्मद अकबर ह लघु वनोपज मन के संग्राहक मन ल राशि के भुगतान म बिल्कुल देरी झन होवय, एकर विशेष ध्यान रखे बर सख्त हुकुम देहे हें।
